Эрхэлсэн ажилдаа амжилт гаргасан эрхмүүдийг Ерөнхийлөгч У.Хүрэлсүх төрийн дээд, одон медалиар шагнаж байна.

Төр засгийн шийдвэрийг иргэдэд түргэн шуурхай хүргэхийн төлөө олон жил ажиллаж, хийж бүтээснээрээ түмэн олондоо үнэлэгдсэн өөрийн гэсэн үнэнч үзэгчтэй болсон сэтгүүлч бол МҮОНТВ-ийн ММ агентлагийн тоймч Ж.Алтангэрэл юм. Парламентын сэтгүүлч Ж.Алтангэрэлийг Монгол Улсын Соёлын гавьяат зүтгэлтэн цолоор шагналаа.

Ж.Алтангэрэл: Парламентын үе үеийн сэтгүүлч, зураглаач, гэрэл зурагчид төрийн түүхийг бүтээгчид 

Парламентын сэтгүүлч Ж.Алтангэрэл: МҮОНРТ-ийн үе үеийн хамт олон уран бүтээлчдийн халуун сэтгэл, дэмжлэг, миний сайхан ханийн түшиг тулгуур, гудамжинд зөрөөд өнгөрөхдөө мэндэлж, урмын үг хайрладаг жирийн үзэгчдэдээ чин сэтгэлээсээ баярлалаа. 
Монгол Улсын Их хурал найман удаа сонгогдсоноос долоод нь парламентын сэтгүүлчээр ажиллаж байна. Парламентын үе үеийн сэтгүүлч, зураглаач, гэрэл зурагчид төрийн түүхийг бүтээгчид гэж боддог. Бидний үзэгний үзүүр хөдөлж, алтан микрофон асах бүрийд Монголын төрийн түүх тасрахгүй, сэтгүүл зүй зөв орших, зөв байх мөч бүхэнд эрүүл төр тогтдог, эрүүл зөв нийгэм оршдог. Монголын сэтгүүл зүйн өмнө нь мэхийе.

С.Наран: Бүх зүйлд чин сэтгэл байх ёстой юм байна гэж бодогдлоо

Чөлөөт уран бүтээлч, дуучин, поп дива Сүрэнжавын Наран Гавьяат жүжигчин цолоор энгэрээ мялаасан юм. 

Тэрбээр "Энэ их өөр мэдрэмж юм байна. Есөн хөлт цагаан тугийнхаа доор зогсох үед “Бүх зүйлд чин сэтгэл байх ёстой юм байна” гэж бодогдлоо. Тэгээд маш сайн ажиллах ёстой хариуцлага мэдрэгдлээ. Улам ихийг хийж, улам их зөв үлгэр дуурайллыг үзүүлэх ёстой юм байна. Миний дууг сонсдог, намайг дэмждэг, намайг хайрладаг бүх хүмүүст чин сэтгэлээсээ талархаж байна. Миний дуу болгон яг чин сэтгэлээсээ миний зүрх сэтгэл, миний оюун ухаан, хүсэл мөрөөдөл багтаж байдаг. Иймдээ ч дандаа эерэг дуу дуулахыг хүсдэг" хэмээв.

---