"Sony" болон "Disney" компаниудын хамтын бүтээл болох "Хүн аалз: Буцах замгүй" нь коронавирусийн цар тахлын үед нэг тэрбум гаруй ам.долларын ашиг орлого олсон анхны кино болжээ. Түүнчлэн тус кино нь 2021 оны хамгийн их орлого олсон бүтээлээр шалгарсан юм.

Үүнээс өмнө, Хятадын "Чанжин нуурын тулалдаан" гэх кино бараг 905 сая ам.долларын ашиг олж, энэхүү амжилтын эзэн болоод байсан билээ. Харин Холливудын бүтээлүүдийн дундаас, Жеймс Бондын "No Time To Die" кино дэлхийн хэмжээнд 774 сая ам.долларын орлого олж, энэ оны болон цар тахлын үеийн хамгийн их ашиг олсон киногоор тодроод байсан юм.

Харин "Марвел" студийн "Хүн аалз: Буцах замгүй" нь нээлтээ хийснээсээ хойш ердөө хоёр долоо хоногийн дараа 1.05 тэрбум ам.долларын орлого олж, шинэ дээд амжилтыг тогтоосон байна. Энэхүү бүтээлээс өмнө, 2019 оны "Оддын дайн: Скайуокерын сэргэн мандалт" нэг тэрбум гаруй ам.долларын орлого олсон бөгөөд хоёр жилийн өмнө цар тахал дэгдсэнээс хойш Холливудын өөр ямар ч уран бүтээл уг амжилтад хүрч чадаагүй байсан билээ.

Гэвч "Хүн аалз: Буцах замгүй" кино нь дэлхийн кино урлагийн хамгийн том зах зээл болох БНХАУ-д нээлтээ хийгээгүй байгаа юм.

Эх сурвалж: BBC

---