Бангладешийн өмнөд хэсгийн Жалакати хотын ойролцоо гатлага онгоц шатсаны улмаас 39 хүн амиа алдаж, 100 орчим хүн шархаджээ.

Гурван тавцантай тус хөлөг онгоц нь нийслэл Дакагаас Баргуна хотыг чиглэн явж байхдаа ийнхүү галд автсан байна. Гал хөдөлгүүрийн өрөөнд эхэлж, маш хурдацтай тархсан бөгөөд олон цагийн турш үргэлжилсэн гэж албаныхан мэдээлсэн юм.

Осолдсон гатлага онгоц нь 500 орчим хүнийг тээвэрлэж явсан аж. Зорчигчдын зарим нь галаас зугтан ус рүү үсэрснийхээ дараа живсэн гэж гэрчүүд ярьсан байна. Түүнчлэн олон хүн ноцтой түлэгдэж, хүнд шархадсан тул тул амиа алдагсдын тоо нэмэгдэж магадгүй юм.

Тус улсад гатлага онгоцнуудын аюулгүй байдлыг хангалттай хянадаггүй бөгөөд зорчигчдыг багтаамж хэтрүүлэн тээвэрлэдэг тул осолдох нь элбэг байдаг. Бүс нутгийн эрх баригчид энэ удаагийн ослыг шалгах тусгай хороо байгуулан ажиллаж байгааг орон нутгийн хэвлэлүүд мэдээлж байна.

Эх сурвалж: BBC

---