Шри Ланка улс Иранаас импортолсон газрын тосны өрөө цайны навчаар төлж барагдуулахаар төлөвлөж байгааг тус улсын Тариалангийн сайд Рамеш Патхирана мэдэгджээ.

Түүний хэлснээр, Шри Ланка 251 сая ам.долларын өрөө дарахын тулд сар бүр таван сая ам.долларын цайны навчийг Иран руу илгээх саналтай байгаа аж. Түүнчлэн, цай нь хүмүүнлэгийн тусламжийн хүнсний бүтээгдэхүүний ангилалд багтдаг тул энэхүү төлбөрийн арга нь НҮБ болон АНУ-ын хориг арга хэмжээг зөрчихгүй гэж Патхирана онцолсон юм.

Тус улсад жилд 340 сая кг цай үйлдвэрлэдэг бөгөөд өнгөрсөн жил 265.5 сая кг цайг экспортолж, 2020 онд 1.24 тэрбум ам.долларын орлого олж байжээ. Шри Ланкын хүн амын бараг таван хувь нь уг салбарт ажилладаг аж.

Мөн энэ нь гадаад өрөө барагдуулахын тулд цайгаар бартер хийж байгаа анхны тохиолдол гэж тус улсын Цайны зөвлөлийн гишүүн тэмдэглэжээ.

Коронавирусийн цар тахлын улмаас Шри-Ланкын аялал жуулчлалын салбарын орлого алдагдаж, гадаад валют болон өрийн хүнд хямралд ороод байгаа билээ. Тус улс нь ирэх онд 4.5 тэрбум ам.долларын өрийн эргэн төлөлтийг хийх ёстой хэдий ч өнгөрөгч 11 дүгээр сарын сүүлчээр гадаад нөөц нь 1.6 тэрбум ам.доллар хүртэл буурсан байна.

Эх сурвалж: BBC

---