О.Цогтгэрэл даргатай АН-д хоёр зам үлдсэн талаар өчигдөр бичсэн. Ардчилсан намд болж буй үйл явдал улам  ээдрээтэй болж байна.

Учир нь Ардчилсан намын гишүүдийн цахим сонгуулиар олонхийн санал авч сонгогдсон М.Тулгатыг АН-ын даргаар бүртгүүлэх хүсэлтийг С.Эрдэнэ даргатай АН-ынхан УДШ-д гаргасан. Энэ талаар тус намын НБД О.Баасанхүү "АН-д ямар ч маргаан, хуваагдал байхгүй. Албан ёсны бүртгэл дээр С.Эрдэнэ АН-ын дарга хэвээр байгаа. Үүнийг л М.Тулгатаар солих процесс үлдээд байгаа" хэмээн өгүүлж байсан юм. 

Гэтэл С.Эрдэнэ дээрх хүсэлтээ буцаан татжээ. Өөрөөр хэлбэл, М.Тулгатыг АН-ын даргаар бүртгүүлэхээр УДШ-д гаргасан хүсэлтээ АН-ын жинхэнэ дарга С.Эрдэнэ буцаан татсан байна.

Яагаад татав гэдэг асуулт хариултаа хүлээж байна. 

Харин С.Эрдэнэ даргатай АН-ын албан ёсны вэб сайт democrats.mn-д "Дүрмийн дагуу АН-ын даргад дэвшсэн М.Тулгатад дүрмийн бусаар дэвшсэн О.Цогтгэрэлтэй үгсэн хуйвалдаж даргын суудлыг наймаалцах тохиролцох дүрэм зөрчих эрх байхгүй! Тэр АН-ын ҮД-ийг ноцтой зөрчсөн үйлдэл хийсэн! Одоо хариуцлагаа шударгаар хүлээх ёстой!!" гэжээ. Өөрөөр хэлбэл, М.Тулгат намын даргаа О.Цогтгэрэлтэй наймаалцах гэж оролдсоныг С.Эрдэнэ илрүүлсэн бололтой. 

---