Хятадын хамгийн том цахим од, стриймер "Вия"-д татвараас зайлсхийсэн хэргээр 1.34 тэрбум юань буюу 210 сая ам.долларын торгууль ногдуулжээ.

"Вия" гэх нэрээр цахим үйл ажиллагаа явуулдаг Хуан Вэй нь хэдэн арван сая дагагчтай бөгөөд цахим платформ дээр төрөл бүрийн бараа бүтээгдэхүүн борлуулдаг юм. Тэгвэл Ханжоугийн эрх баригчид түүнийг 2019-2020 оны хооронд хувийн орлогоо нуун дарагдуулж, бусад санхүүгийн гэмт хэрэг үйлдсэн хэрэгт буруутгасан байна.

36 настай Хуан Вэй өөрийн олон нийтийн сүлжээндээ "Намайг үнэхээр уучлаарай. Татварын албанаас оноосон шийтгэлийг би чин сэтгэлээсээ хүлээн зөвшөөрч байна" гэж бичжээ.

Хятадад онлайн дэлгүүрийн салбар хурдацтай өсөж байгаагийн нөлөөгөөр "Вия" цахим сүлжээний томоохон од болсон бөгөөд тус улсын иргэд түүнийг "Стриймер хатан хаан" хэмээн нэрлээд байсан билээ. Тэрээр "Taobao" онлайн худалдааны платформ дээр бэлэн гоймонгоос эхлээд арилжааны пуужин хүртэл төрөл бүрийн зүйлийг зардаг аж. Энэхүү асар том платформынхоо ачаар Хуан Вэй 2021 онд "Time" сэтгүүлээс гаргасан дэлхийн хамгийн нөлөө бүхий 100 хүний ​​жагсаалтад багтсан юм.

Гэвч энэ удаагийн хэргийн дараа түүний нэр хүнд хурдацтай унаж байгаа бөгөөд Хятадын эрх баригчид бусдад анхааруулга болгож ийм шийтгэл ногдуулсан гэж шинжээчид үзэж байна. Тус улс нь дэлхийн хамгийн том стриймерийн салбартай бөгөөд 400 сая гаруй влоггертой. Тиймээс албаныхан энэхүү салбарт шинэчлэл хийхийг эрмэлзэж байгаа нь сүүлийн үед ил тод харагдах болсон юм.

Одоо "Вия"-гийн 18 сая дагагчтай "Weibo" хуудас устсан бөгөөд "Taobao" хаяг нь ч хаагдсан байна.

Эх сурвалж: BBC

---