Хүний амьсгалын замын эд эсийн лабораторийн дээжид коронавирусийн "Омикрон" хувилбарын халдвар "Дельта" хувилбараас 70 дахин хурдан тархдаг болох нь Хонконгийн их сургуулийн судалгаагаар тогтоогджээ.

Энэхүү лабораторийн судалгааг гүйцэтгэсэн эрдэмтэд хүний уушги болон гуурсан хоолойн эд эсэд дээрх хоёр хувилбарын вирусийг тараасан байна. Ингээд 24 цагийн дараа дахин шалгахад, "Омикрон"-ы вирус гуурсан хоолойн эдэд "Дельта" хувилбараас 70 дахин хурдан үржсэн байжээ. Харин уушгины эдэд эсрэгээрээ илүү удаан тархсан аж.

Судалгааны үр дүнд, "Омикрон" хувилбар нь цар тахлын өмнөх хувилбаруудаас илүү хурдан тархах чадалтай хэдий ч "өвчний хүндрэл бага байхыг харуулж байна" гэж эрдэмтэд тэмдэглэжээ.

Гэхдээ ДЭМБ-аас тус шинэ хувилбарыг илүү "хөнгөн" гэж дүгнэхэд хэтэрхий эрт байна гэж анхааруулаад байгаа юм.

Эх сурвалж: Insider

---