Их Британи, Австрали улсууд чөлөөт худалдааны гэрээ байгуулсан бөгөөд ирэх жилээс хэрэгжиж эхлэх энэхүү хэлэлцээр нь хоёр улсын хэрэглэгч болон аж ахуйн нэгжүүдэд өндөр ашигтай байна гэж үзэж байна.

Энэ нь Их Британи улсын "Брексит"-ээс хойших анхны томоохон хэлэлцээр бөгөөд үүний хүрээнд тус улсын бүх экспортын татварыг зогсоохын зэрэгцээ 10.4 тэрбум фунт стерлингийн нэмэлт худалдааг нээнэ гэж тооцоолжээ. Түүнчлэн хурдацтай хөгжиж буй Энэтхэг-Номхон далайн бүс нутгийн зах зээлд нэвтэрч, дэлхийн хамгийн том чөлөөт худалдааны бүсүүдийн нэг болох Транс-Номхон далайн түншлэлд нэгдэх боломж бий болно гэж тус улсын Засгийн газраас тэмдэглэсэн юм.

Австрали улсын хувьд энэ нь өөр улстай байгуулсан хоёр дахь том худалдааны гэрээ бөгөөд тус улсын зүгээс ч мөн энэ явдлыг өндрөөр үнэлж байна. Уг чөлөөт худалдааны хэлэлцээрийн дагуу, Австралийн экспортуудын 99 хувийн татварыг үгүй хийх бөгөөд австраличууд Их Британид ажиллаж, амьдрахад илүү хялбар болох аж.

Мөн Австралийн дарс, үхрийн мах, элсэн чихэр зэрэг бүтээгдэхүүний борлуулалтыг нэмэгдүүлэхэд тусална гэжээ. Сүүлийн үед үүссэн улс төрийн хурцадмал байдлын улмаас тус улсын экспортын гол зах зээл болох БНХАУ эдгээр барааг бойкотлоод байгаа билээ.

Эх сурвалж: BBC

---