Мексикийн жүжигчин, дуучин Таня Мендозаг нэгэн үл таних этгээд буудаж хороожээ.

Өнгөрөгч мягмар гарагт Куервака хотод болсон энэ хэргээс өмнө Мендоза хүүгээ хөлбөмбөгийн бэлтгэлээс нь авахаар хүлээж байсан гэж албаныхан мэдээлсэн байна. Тэрээр бусад эцэг эхийн хамт хотын спорт цогцолборын гадаа зогсож байсан бөгөөд энэ үеэр мотоцикл унасан хоёр этгээд ойролцоо зогсоод, тэдний нэг нь жүжигчин бүсгүйг хэд хэдэн удаа буудсан аж.

Хэргийн газраас зугтсан этгээдүүдийн хэн болох, ямар шалтгаанаар ийм хэрэг үйлдсэн нь одоогоор тодорхойгүй байгаа юм. Орон нутгийн цагдаа нар сэжигтнүүдийг эрэн сурвалжилж байгаа хэдий ч хэнийг ч баривчлаагүй байна.

42 настай байсан Таня Мендоза 2005 онд "Ла Мера Рейна дель Сур" кинонд гол дүр бүтээснийхээ дараа алдар нэрд хүрчээ. Тэрээр 2010 онд нөхөр, зургаан сартай хүүгийнхээ хамт барьцаалагдаж байсан бөгөөд уг явдлаас хойш хэд хэдэн удаа амь насыг нь заналхийлсэн мессеж хүлээж авсныгаа Морелос мужийн Ерөнхий прокурорын газарт мэдэгдэж байсан аж.

Мексик улсад өнгөрсөн онд өдөр бүр дор хаяж 10 эмэгтэй бусдын гарт амиа алдсан гэх албан ёсны мэдээ байгаа юм. "Эмнести Интернэшнл" хүний эрхийн байгууллагын мэдээлснээр, амиа алдсан иргэдийн бараг гуравны нэг нь буюу 940 нь хүйсээр нь ялгаварлан гадуурхаж, эмэгтэйчүүдийг санаатайгаар хөнөөсөн хэргийн хохирогчид байжээ.

Эх сурвалж: BBC

---