Хаити улсын хойд хэсгийн Кап-Хайтьен хотод шатахуун ачсан автомашин осолдон, дэлбэрсний улмаас 60 гаруй хүн амь үрэгджээ. 

Тус автомашин осолдсоны дараа олон тооны иргэн асгарсан шатахууныг цуглуулах гэж оролдсон бөгөөд энэ үеэр гал авалцсан гэж албаны эх сурвалжууд мэдээлсэн байна. Мөн дэлбэрэлтийн улмаас 20 орчим байшин шатсан гэнэ.

Уг ослын улмаас олон арван хүн хүнд шархадсан бөгөөд орон нутгийн эмнэлгүүд ачааллаа дийлэхгүй байгаа юм. Эмнэлгүүд хүн хүч, эмнэлгийн хэрэгслээр дутаж байгаа тул амиа алдагсдын тоо нэмэгдэж магадгүй гэж эмч нар мэдэгджээ.

Тус улсын Засгийн газрын зүгээс дэлбэрэлтэд өртсөн хүмүүст туслахын тулд хээрийн эмнэлгүүдийг байгуулж байгаа бөгөөд Ерөнхий сайд Ариэль Хенри гурван өдрийн гашуудал зарласан байна.

Хаитигийн гэмт бүлэглэлүүд тус улс даяарх шатахуун түгээлтийн системийн ихэнх хэсгийг хяналтдаа авсны улмаас шатахууны хомсдолд үүсээд байгаа билээ. Мөн энэ оны эхээр Ерөнхийлөгч Жовенел Моисе алагдсаны дараа эдийн засаг, улс төрийн томоохон хямрал нүүрлээд байгаа юм.

Эх сурвалж: BBC

---