Хөвсгөл аймгийн нэгэн сумын нутаг дахь гүний худагт хүүхэд унаж нас барсан цогцсыг гаргахад тусламж хэрэгтэй байна гэсэн дуудлагыг энэ сарын 14-ний өдрийн 18:12 цагт Онцгой байдлын газар хүлээн авчээ.

Тус аймгийн Онцгой байдлын газрын Гал түймэр унтраах, аврах 46 дугаар ангийн алба хаагчид 13 км замыг туулан 19:08 цагт очиж 2.8 метрийн гүнтэй худагт 4 настай, эрэгтэй хүүхэд унаж нас барсан байсныг 16 минут ажиллаж цогцсыг гарган сумын Цагдаагийн хэсгийн төлөөлөгчид шилжүүлэн өгсөн байна.

Энэ талаар Хөвсгөл аймгийн Онцгой байдлын газраас тодруулахад, "Гар ажиллагаатай мал усалдаг 2 метр 50 см гүний худгийн төмөр таг цөмөрч хүүхэд осолдсон байдалтай байсныг гарган авч сумын Цагдаагийн тасгийн экологийн цагдаад хүлээлгэн өгсөн" гэсэн юм.

Түүнчлэн Өмнөговь аймгийн Гурвантэс суманд иргэн Э /31 настай, эмэгтэй/ гэрийнхээ нүхэн жорлонд унаж нас барсан байдалтай олдсон байна.  Тус аймгийн Онцгой байдлын газрын Гал түймэр унтраах, аврах 67 дугаар ангийн алба хаагчид  очиж 1.8 метрийн гүнтэй нүхэн жорлонд иргэн Э /31 настай, эмэгтэй/ унаж нас барсан байдалтай байсныг 1 цаг 50 минут ажиллаж цогцсыг гарган аймгийн Цагдаагийн газрын мөрдөн байцаагчид шилжүүлж өгсөн.

---