"Тесла" болон "SpaceX" компанийн Гүйцэтгэх захирал Элон Маск "Time" сэтгүүлийн "Оны онцлох хүн"-ээр тодорсон байна.

Тус сэтгүүлийн Ерөнхий редактор Эдвард Фелсентал энэ шийдвэрийн талаар "Оны хүн бол нөлөөллийн бэлгэ тэмдэг бөгөөд энэ жил цөөхөн хүн дэлхий дээрх амьдрал болон сансрын амьдралд Элон Маскаас илүү нөлөө үзүүлсэн. 2021 онд Маск дэлхийн хамгийн баян хүнээр тодроод зогсолгүй манай нийгэмд гарч буй асар их өөрчлөлтийн хамгийн тод жишээ болж чадсан" хэмээн бичжээ.

Өнгөрсөн жилийн хугацаанд "Тесла"-гийн хувьцааны үнэ өссөний улмаас Маск дэлхийн хамгийн баян хүн болж, олны анхаарлын төвд орсон билээ. Мөн тэрээр "SpaceX"-ийн төслийн хүрээнд зөвхөн жуулчдаас бүрдсэн анхны багийг дэлхийн тойрог замд илгээж, түүхэнд бичигдсэн юм.

Elon Musk (@elonmusk) is TIME's 2021 Person of the Year #TIMEPOY https://t.co/8Y5BhIldNs pic.twitter.com/B6h6rndjIh

— TIME (@TIME) December 13, 2021

"Time" сэтгүүл жил бүр хамгийн их нөлөөтэй байсан хүн, бүлэг, хөдөлгөөн, үзэл санааг сонгон, "Оны онцлох хүн"-ээр өргөмжилдөг бөгөөд энэхүү уламжлал 1927 оноос хойш тасралтгүй үргэлжилж байгаа. 2020 онд Жо Байден, Камала Харрис нар "Оны хүн"-ээр хамтдаа шалгарсан билээ.

Гэхдээ ийнхүү сонгогдох нь үргэлж нэр төрийн явдал байдаггүй бөгөөд сөрөг нөлөөллийн улмаас шалгарах боломжтой. Жишээлбэл, 1938 онд Адольф Гитлер "Оны хүн"-ээр тодорч байсан юм.

Түүнчлэн "Time" сэтгүүл 2019 оноос энэ шалгаруулалтыг өргөжүүлж, нэмэлт ангиллуудыг бий болгосон билээ. АНУ-ын поп дуучин Оливиа Родриго энэ оны "Шилдэг уран бүтээлч"-ээр шалгарсан бол Олимпын наадмын дөрвөн удаагийн алтан медальт Симон Байлс "Шилдэг тамирчин"-аар тодорсон байна.

Харин "Оны баатрууд"-ын цолыг коронавирусийн "mRNA" вакциныг бүтээсэн эрдэмтэд, тэр дундаа Каталин Карико, Барни Грэхэм, Киззмекиа Корбетт болон Дрю Вайсман нар хүртжээ.

Эх сурвалж: CNN

---