Сонгинохайрхан дүүргийн 34 дүгээр хорооны иргэн М.Батболд өөрийн өрхийн хэрэглээндээ нарны эрчим хүч ашиглаж дулаан, цахилгаан үйлдвэрлэж, илүү гарсан цахилгаан эрчим хүчээ улсад нийлүүлж буйтай өнөөдөр Эрчим хүчний сайд Н.Тавинбэх бусад албаны хүмүүс танилцлаа.

Сэргээгдэх эрчим хүчийг ахуйн хэрэглээнд нэвтрүүлэх эрх зүйн зохицуулалт гараад хоёр жил болж байгаа ч өнөөдрийг хүртэл айл өрхүүд төдийлөн цахилгаан, дулаанаа шийдэж чадахгүй байгаа юм. 

Эрчим хүчний сайд Н.Тавинбэх:

-Эрх зүйн зохицуулалт гарсан ч хэрэгжихэд ямар хүндрэл байна. Хэрхэн яаж засаж, залруулах боломжтой талаар ойрын үед судалж байна. Учир нь гэвэл манай улс эрчим хүчний дутагдалтай. Уг дутагдлаас гарахад байгаль, орчинд сөрөг нөлөөгүй сэргээгдэх эрчим хүчийг айл өрхүүд хэрэглээндээ нэврүүлэх боломжийг олгох ёстой. Мэдээж төр засаг бүгдийг даана гэж байхгүй. Гэхдээ иргэдэд эдийн засгийн ачаалал өгөхгүйгээр сэргээгдэх эрчим хүчний эх үүсгэвэртэй болгох талаар ойрын хугацаанд ажиллах болно. Сэргээгдэх эрчим хүч ашиглаж байгаа энэ айлын хувьд өрхийн хэрэглээний цахилгаан, дулаанаас илүү гарсан эрчим хүчээ улсад нийлүүлэн, орлого боломжтой болсон байна. Түүнчлэн айл өрхүүд дулаан алдагдалгүй орон сууцтай байснаар эрчим хүч хэмнэх томоохон алхам юм гэлээ. 

---