Мексикийн өмнөд хэсэгт 100 гаруй цагаачийг тээвэрлэж явсан ачааны машин осолдсоны улмаас 53 хүн амиа алдаж, олон арван хүн шархаджээ.

Чиапас мужид осолдсон энэхүү ачааны машины чиргүүл дотор олон хууль бус цагаач чихэлдэж явсныг албаныхан мэдээлсэн байна. Тэдний иргэншил одоогоор батлагдаагүй байгаа ч ихэнх нь Хондурас, Гватемалаас ирсэн гэж албаны эх сурвалж тэмдэглэсэн юм.

Тус ачааны машин Чиапас мужийн нийслэл Тугштла Гутиерре руу чиглэсэн төв зам дээр хурд хэтрүүлж байгаад огцом эргэлт дээр онхолдон, явган хүний ​​гүүр мөргөсөн байна. Ослын улмаас 58 хүн гэмтэж бэртсэн бөгөөд хохирогчдын дунд бага насны хүүхдүүд ч байжээ.

Гватемалтай хөрш зэргэлдээ орших Чиапас муж нь бичиг баримтгүй цагаачдын дамжин өнгөрдөг гол цэг аж. Төв Америкийн ядуурал, хүчирхийллээс зугтсан цагаачид АНУ-д хүрэхийн тулд жилд хэдэн зуун мянгаараа Мексикээр дамжин өнгөрөхийг оролддог билээ. Тэдний олонх нь хууль бус тээвэрлэгчдэд мөнгө төлөн, хэтэрхий их хүнтэй ачааны машин дотор суун, хол замыг тэсвэрлэн аялдаг юм.

Эх сурвалж: BBC

---