Шинэ Зеланд улсын эрх баригчид хойч үедээ тамхи худалдаалахыг хориглож, эцэст нь тамхинаас бүрэн татгалзахаар төлөвлөж байна. Ирэх оноос хэрэгжиж эхлэх шинэ хуулийн дагуу, 2008 оноос хойш төрсөн иргэд насан туршдаа тамхи худалдаж авах боломжгүй болох аж.

Тус улсын Эрүүл мэндийн сайд Айеша Вералл энэ талаар мэдэгдэхдээ "Бид залуучуудыг хэзээ ч тамхи татаж эхлэхгүй байхыг хүсэж байна" хэмээн тэмдэглэжээ.

Энэхүү арга хэмжээ нь Шинэ Зеландын Эрүүл мэндийн яамнаас зарласан тамхины хэрэглээний эсрэг өргөн хүрээний тэмцлийн нэг хэсэг юм. Үүний хүрээнд Засгийн газрын зүгээс тамхины хяналтыг нэвтрүүлж, никотины хэмжээг нь хязгаарлан, хүртээмжийг нь бууруулах аж. Ингэснээр, супермаркет болон жижиг дэлгүүрүүдэд тамхи зарж борлуулахыг хориглох бөгөөд тамхи худалдаалах эрх бүхий 8,000 орчим дэлгүүрийн тоог 500 хүртэл бууруулна гэжээ.

Одоогийн байдлаар Шинэ Зеландын насанд хүрэгчдийн 13 хувь нь тамхи татдаг гэсэн судалгаа гарсан байна. Тэгвэл тус улсын удирдлагууд 2025 он гэхэд тамхидалтын хэмжээг таван хувь хүртэл бууруулах үндэсний зорилт тавиад байгаа бөгөөд ирээдүйд тамхины хэрэглээг бүрмөсөн устгахаар зорьж байгаа аж.

Уг шийдвэрийг зарим иргэд баяртайгаар хүлээж аван, дэмжиж байгаа бол зарим нь тамхины хар зах зээл үүсэж болзошгүйд санаа зовниж буйгаа илэрхийлжээ.

Эх сурвалж: BBC

---