Финландын Ерөнхий сайд Санна Марин коронавирустэй хүний ойрын хавьтал болсон гэдгээ мэдэж байсан хэдий ч шөнийн цэнгээний газраар үйлчлүүлсэн болох нь ил болсны дараа уучлалт гуйжээ.

36 настай Марин өнгөрөгч бямба гарагт Хельсинкийн шөнийн цэнгээний газарт үүрийн 04:00 цаг хүртэл байсан болохыг орон нутгийн нэгэн сэтгүүл мэдээлж, түүний зургийг нийтэлсэн байна. Ерөнхий сайдын энэ үйлдлээс хэдхэн цагийн өмнө тус улсын Гадаад хэргийн сайд Пекка Хаавистогийн коронавирусийн шинжилгээний хариу "Эерэг" гараад байсан аж.

Тэгвэл Марин өөрийн "Facebook" хуудсаараа дамжуулан уучлалт гуйхдаа "Би нөхрийнхөө хамт гадуур хооллож, дэлгүүр хэсэн, найз нөхөдтэйгөө уулзсан бөгөөд хотын шөнийн амьдралыг үзсэн. Хэдий би халдвар авсан хүний ойрын хавьтал болсон ч намайг тусгаарлалтад орох шаардлагагүй гэж албаны хүн хэлсэн. Гэхдээ би илүү сайн дүгнэлт хийж, надад өгсөн удирдамжийг дахин шалгах ёстой байсан. Үүнийг ойлгоогүйдээ маш их харамсаж байна" хэмээн бичжээ.

Финланд нь цар тахлын тохиолдлын тоогоороо Европт хамгийн бага үзүүлэлтүүдийн нэгтэй байсан хэдий ч сүүлийн үед тус улсад халдварын тархалт урьд өмнө байгаагүй өндөр түвшинд хүрээд зогсолгүй шинэ "Омикрон" хувилбарын найман тохиолдол бүртгэгдээд байгаа юм.

Эх сурвалж: AFP

---