Сүхбаатар дүүргийн 24 дүгээр цэцэрлэгийн эрхлэгчээр ажиллаж байсан Д.Энхцэцэг, бүлгийн багш Н.Баярмаа, туслах багш С.Байгальмаа, иргэн Б.Энхтуул нарт холбогдох, хээл хахууль авсан, өгсөн, зуучилсан хэрэгт НПГ-аас яллах дүгнэлт үйлдэн шүүхэд шилжүүлжээ.

Цэцэрлэгийн багш, захирал нар хамран сургах тойргийн бус хаягт амьдардаг иргэн Б.Энхтуулын хүүхдийг цэцэрлэгт оруулахын тулд өнгөрсөн оны есдүгээр сард 500 мянган төгрөг хуваан авсан хэрэгт хамтран оролцсон үйлдэлд холбогдсон байна.  

Прокурорын байгууллага өнгөрсөн долоо хоногт хэрэг хянан шийдвэрлэх ажиллагаанд оролцогчдоос гаргасан 230 гомдол, хүсэлтийг шийдвэрлэж, мөрдөгч болон зөрчлийн хэрэг бүртгэх эрх бүхий албан тушаалтанд тодорхой ажиллагаа гүйцэтгүүлэхээр 430 даалгавар бичгээр өгчээ. Мөрдөн байцаалтын 2741 хэрэгт хяналт тавьж, 397-д нь яллах дүгнэлт үйлдэн шүүхэд шилжүүлэхээр болсон аж. Тэдний дунд хүрээлэн байгаа орчны эсрэг болон авлигын тус бүр 14 байгаагийн дотор дээрх цэцэрлэгийн багш, захирлын хэрэг буй юм.

---