Австралийн Сидней хотод хувиараа бизнес эрхэлдэг 10 настай Пикси Кертис эрт тэтгэвэрт гарахаар төлөвлөж байгаа гэнэ.

Түүний ээж Рокси Жасенко анх 2011 онд "Pixie's Bows" хэмээх үсний боолт, гоёл чимэглэлийн брэндийг үүсгэн байгуулсан бөгөөд түүнээс хойш энэхүү бизнесээ охинтойгоо хамтран эрхэлж байгаа аж. Түүнчлэн ээж, охин хоёр өнгөрөгч 5 дугаар сард "Pixie's Fidgets" гэх нэртэй тоглоомын бизнесээ эхлүүлсэн бөгөөд тэд эхний сардаа л 200 мянга гаруй ам.долларын бүтээгдэхүүн борлуулжээ.

Эдгээр хоёр брэндийнхээ ачаар тэд ирэх арван жилд 21 сая ам.долларын орлого олох төлөвтэй байна.

Ийнхүү багаасаа бизнес эрхэлж байгаа Пикси ахлах сургуулиа төгсөхөөсөө өмнө санхүүгийн эрх чөлөөнд хүрж магадгүй байгаа бөгөөд тэрээр 15 насандаа тэтгэвэртээ гарахаар төлөвлөж байгааг нь ээж нь хэлжээ. Жасенко охиныхоо ажил хэрэгч, хичээнгүй байдлыг сайшаан, "Тэр ийм багаасаа бизнес сэтгэлгээтэй байгаад үнэхээр гайхдаг" хэмээн сэтгүүлчдэд ярьсан юм.

Харин Пикси олсон орлогоороо ээждээ хувцас авч өгөөд зогсолгүй гэр бүлээ тансаг амралтад явуулахаар төлөвлөж байгаагаа дурджээ.

Эх сурвалж: New York Post

---