Австри улсын нэгэн мэс засалч өвчтөнийхөө буруу хөлийг тайрсан хэрэг энэ оны эхээр гарчээ. Тэгвэл Линц хотын шүүхээс түүнийг ажилдаа хайхрамжгүй хандсан гэж үзэн, 2,700 еврогийн торгууль ногдуулсан байна.

Холбогдох өвчтөн нь өнгөрөгч лхагва гарагт болсон шүүх хурлаас өмнө нас барсан бөгөөд талийгаачийн бэлэвсэн эхнэрт 5,000 еврогийн нөхөн төлбөр олгосон юм.

Хэргийг тодруулбал, талийгаач эрэгтэй өнгөрсөн 5 дугаар сард Фрейстадт дахь эмнэлэгт зүүн хөлөө тайруулахаар хандсан боловч мэс засалч нь түүний баруун хөлийг тэмдэглэн, тайрсан байна. Ингээд мэс заслаас хоёр хоногийн дараа тус өвчтөний боолтыг солих үеэр эмнэлгийн ажилтнууд алдаагаа ухаарсан бөгөөд өндөр настай өвчтөний нөгөө хөлийг нь тайрах шаардлагатай гэж хэлжээ.

Шүүх хурлын үеэр уг мэс засалч эмнэлгийн удирдлагуудын харилцаа холбоонд асуудал гарсан гэж тайлбарласан байна. Түүнээс яагаад өвчтөний зүүн биш баруун хөлийг тэмдэглэснийг нь асуухад тэрээр "Би мэдэхгүй байна" гэж хариулсан аж.

Хэрэг гарснаас хойш тус мэс засалч өөр эмнэлэг рүү шилжсэн бөгөөд түүнд ногдуулсан торгуулийн тал хувийг түдгэлзүүлээд байгаа аж.

Эх сурвалж: BBC

---