Грек улсад 60-аас дээш насны иргэдийг коронавирусийн эсрэг вакцинжуулалтад заавал хамрагдахыг шаардах болсон бөгөөд татгалзсан хүмүүст сар бүр 100 еврогийн торгууль ногдуулна гэж тус улсын Ерөнхий сайд Кириакос Мицотакис мэдэгджээ.

Энэхүү шинэ журмыг ирэх оны 1 дүгээр 16-наас хэрэгжүүлэх бөгөөд торгуулийн мөнгийг Грекийн эрүүл мэндийн системд зарцуулах аж. Тус улсын нийт 11 сая хүн амын 63 орчим хувь нь дархлаажуулалтад бүрэн хамрагдсан боловч 60-аас дээш насны 520 мянга гаруй хүн вакцинд огт хамрагдаагүй байгаа юм.

Уг торгуулийн арга хэмжээг Парламентын санал хураалтаар шийдвэрлээгүй байгаа хэдий ч хууль тогтоогчид үүнийг батлах төлөвтэй байгаа гэнэ. Дэлхийн улс орнууд эрүүл мэндийн ажилтнууд болон бусад өндөр эрсдэлтэй хүмүүсийг заавал вакцинд хамрагдахыг шаардаж байсан боловч Грек улс нь тодорхой насны бүлэгт ийм шаардлага тавьсан Европын Холбооны анхны улс болж байна.

Тус улсын гол сөрөг хүчин болох "Сириза" нам энэхүү шинэ журмыг иргэдээ шийтгэсэн явдал бөгөөд санхүүгийн хувьд хэт хатуу арга хэмжээ гэж шүүмжилжээ.

Ерөнхий сайд Мицотакисийн хувьд ч мөн уг шийдвэрийг гаргахад хүнд байсан боловч тэрээр "Хамгийн эмзэг бүлгийнхнийг хамгаалах хариуцлагаа биелүүлэхийн тулд түр зур тэдний дургүйг хүргэж болзошгүй үйлдлийг хийхээс өөр аргагүй байсан" гэж тайлбарласан байна.

Эх сурвалж: BBC

---