Ирландын гурван муж дахь бэлэн мөнгөний машинуудаас нийт 790 мянган евро хулгайлсан гэмт бүлэглэлийн гишүүн Ниалл Финнеганд гурван жилийн хорих ял оноожээ.

Түүний холбогдсон гэмт хэргийн бүлэглэл нь 2018-2019 оны хооронд Каван, Монаган, Меат мужуудад зургаан бэлэн мөнгөний машиныг экскаватораар дээрэмдсэн байна.

Тус бүлэглэл 2019 оны 8 дугаар сарын 14-нд Каван мужийн нэгэн банкны бэлэн мөнгөний машиныг дээрэмдэхийг завдаж байх үеэр орон нутгийн цагдаа нар тэдний ажиллагааг таслан зогсоож, гурван эрэгтэйг баривчилсан аж. Үүнээс хойш зургаан хоногийн дараа цагдаа нар тэднийг сулласан бөгөөд Финнеган бүлгийнхээ нэг гишүүнтэй уулзан, Меат муж дахь нууц байршлаасаа хулгайлсан мөнгөө ухаж гарган, саравчинд хийсэн байна. Албаныхан уг саравчинд нэгжлэг хийхэд хоёр хуванцар саванд хийсэн 298,900 евро олсон бол харин Финнеганы автомашинаас 103,900 евро олжээ.

Ингээд Финнеган хэргээ хүлээж, шүүхэд өөрийгөө гэм буруутай гэж мэдүүлээд зогсолгүй насан туршдаа дахиж асуудалд орохгүй гэж амласан байна. Тэгвэл орон нутгийн шүүхээс түүнд дөрвөн жил хагасын хорих ял оноож, 18 сарыг нь биечлэн эдлүүлэхгүй байхаар шийдвэрлэжээ. 

Өнгөрөгч даваа гарагт болсон шүүх хурлын үеэр Ниалл Финнеган Зул сарын баярыг хүүхдүүдтэйгээ өнгөрүүлэхийн тулд хорих ялыг нь хойшлуулахыг шүүгчээс хүссэн хэдий ч түүний хүсэлтийг хүлээж аваагүй аж.

Эх сурвалж: BBC

---