Монгол улсын Засгийн газрын хуралдаанд эрчим, хүчний салбараас ямар, ямар асуудлыг өргөн барьж, хэлэлцүүлсэн талаар Эрчим хүчний сайд Н.Тавинбэхээс тодрууллаа. 

-Хийн хоолойг манай улсаар дайруулах нь эдийн засагт хэр ашигтай гэж үзэж байгаа вэ? 

Эрчим хүчний сайд Н.Тавинбэх:

-Маш ашигтай төсөл. ОХУ болон БНХАУ-ын талаас манай улсаар дайруулан явуулах трассаа тохирсон. Сайн мэдээ нь бодитой ажил болоод явж байгаа. 

-Эгийн голын УЦС тойрсон явган яриа сүүлийн үед гарах боллоо. Сүүлд ямар үйл явдал өрнөж байгаа талаар мэдээлэл өгөхгүй юу?

-ОХУ-ын талаас байгальд үзүүлэх нөлөөллийн үнэлгээг хийлгэх хүсэлт тавьсан. Энэ дагуу бид нээлттэй тендер зарлаж, БНФУ-ын нэгэн компани шалгарсан байгаа. Үнэлгээг ирэх жилийн долдугаар сард танилцуулна. Тэрний дараа энэ талаар эргэж ярих боломжтой. 

-Монголд сайжруулсан түлшний шуудай, барьцалдуулагч үйлдвэрлэдэг үйлдвэрүүд байсаар байхад олон сая ам.доллараар гаднаас авч байна гэсэн шүүмжлэл байгаа? 

-Барьцалдуулагчийн тендер дээр таван компани орсноос хоёр нь шалгарсан. Гэвч одоогоор гэрээнд заасан үүргээ биелүүлж чадахгүй байгаа. Шалтгааныг нь асуухаар, барьцуулагчид ордог цардуулаа авч чадахгүй байна гэж тайлбарладаг. 

Харин шуудайны тендер дээр ямар нэгэн компани ороогүй. Жижиг хэмжээний шуудай үйлдвэрлэдэг үйлдвэр удахгүй ашиглалтад орох байх аа гэж найдаж байна. Бид хуучин шуудайг эргэн ашиглаж байгаа гэв. 

---