Венесуэлийн 12 мянга орчим хөгжимчин П.И.Чайковскийн "Славянский марш" симфонийг 12 минутын турш тоглож, Гиннесийн номын дээд амжилтыг эвдэн, дэлхийн хамгийн том найрал хөгжим болжээ.

Тус улсын Хүүхэд, залуучуудын найрал хөгжмийн үндэсний систем болох "Эл система" хөтөлбөр хөгжимчдийг цуглуулан, дээд амжилт тогтоох оролдлогыг зохион байгуулсан байна. Энэхүү хөтөлбөрт 350 мянга орчим хүүхэд, залуучууд хамаардаг бөгөөд тэд 180 найрал хөгжимд тоглодог аж. "Эл система"-гийн захирал Эдуардо Мендес "Энэ бол зөвхөн бидний хөтөлбөр төдийгүй манай улсын хувьд маш том амжилт" гэж хэлжээ.

Энэ сарын 13-нд болсон тус тоглолтод 12-77 насны 12 мянга орчим хөгжимчин оролцсон хэдий ч Гиннесийн номоос тэдний зөвхөн 8,573-ийг албан ёсоор тооцсон байна. Дээд амжилт тогтоох шалгуурын дагуу, хөгжимчин бүр дор хаяж таван минутын турш тоглох ёстой бөгөөд хөгжмийн зэмсгээ сольж болохгүй аж.

Уг найрал хөгжим "Славянский марш" симфонийг дор хаяж таван минут гаруйн турш тоглож, шинэ дээд амжилтыг амжилттай тогтоосон гэж Гиннесийн номын мэргэжилтэн Сюзана Рейес өнгөрөгч бямба гарагт зарлажээ. Өмнөх дээд амжилтыг ОХУ-ын 8,097 хөгжимчний бүрэлдэхүүнтэй найрал хөгжим тус улсын төрийн дууллыг эгшиглүүлэн тогтоож байсан юм.

Эх сурвалж: Deutsche Welle

---