Коронавирусийн тархалт нэмэгдсэний улмаас Австри улс даяар дахин хөл хорионы дэглэмд шилжихээр болсон байна. Иргэдийг гэрээсээ ажиллах болон хүнсний дэлгүүр, эмийн сангаас бусад дэлгүүр, худалдааны төвүүд, бизнесийн байгууллагуудыг хаах шийдвэрийг эрх баригчид гаргажээ.

Австрийн иргэд дахин хөл хорионд орох шийдвэрийг эсэргүүцэж жагсаал хийсэн бөгөөд уг жагсаал зөвхөн Австри улсаар хязгаарлагдсангүй. Европын улс орнуудад хөл хориог эсэргүүцсэн жагсаалууд өнгөрсөн амралтын өдрүүдэд газар авчээ.

Нидерланд, Бельги улсуудад жагсагчид цагдаа нартай мөргөлдсөн байна. Дэлхийн эрүүл мэндийн байгууллагаас Европ тивд цар тахлын ээлжит давлагаа ирж, халдвар хурдтай тархаж байгааг сэрэмжлүүлжээ.

Австри улс өнгөрсөн долоо хоногт коронавирусийн эсрэг вакцинжуулалтыг хуульчилсан Европын анхны улс болсон юм. Хууль ирэх оны хоёрдугаар сараас хэрэгжиж эхэлнэ. Хөрш зэргэлдээх Европын Герман зэрэг бусад улс орнуудын улс төрчид ч мөн ижил шийдвэр гаргахаар хэлэлцэж эхэлжээ.

Цар тахал эхэлснээс хойш Австри улс дөрөв дэх удаагаа хөл хорионд орж байна. Ирэх 12 дугаар сарын 12-ны өдөр хүртэл зоогийн газар, бар, үсчин, театр, худалдааны төвүүдийг хаахаар болжээ.

Венад 40,000 хүн хөл хориог эсэргүүцсэн жагсаалд нэгдсэн бол Нидерландын Гаагь, Амстердам хотуудад олон арван мянган иргэн жагссан байна. Хорватын нийслэл Загреб, Данийн Копенхаген хотуудад ч мөн мянга мянган жагсагч жагсаалд нэгджээ. Жагсаалуудын үеэр олон арван хүнийг баривчлан саатуулсан байна.

Эх сурвалж: ВВС, CNN

---