ОХУ-ын Ерөнхийлөгч Владимир Путин тус улсын Гамалейн судалгааны хүрээлэнгийн хөгжүүлж буй хамрын цацлага хэлбэрийн коронавирусийн эсрэг вакцины эмнэлзүйн туршилтад оролцох хүсэлтэй байгаагаа мэдэгджээ.

Тэрээр өнгөрөгч ням гарагт тус төвийн шинэ бүтээн байгуулалттай танилцах үеэрээ энэ хүслээ илэрхийлж, Гамалейн хүрээлэнгийн Дэд захирал Денис Логуновоос "Би энэ туршилтад оролцож болох уу?" гэж асуусан байна. Логунов үүний хариуд "Мэдээжийн хэрэг" гэж хэлсэн бөгөөд Ерөнхийлөгч Путиныг зөвшөөрлийн бичигт гарын үсэг зурах ёстой гэдгийг тэмдэглэжээ.

Харин Путин "Би гарын үсэг зурна. Ойлголоо. Бид үүнийг өнөөдөр ч хийж болно" гэж хариулсан аж. Тэрээр мөн саяхан коронавирусийн эсрэг нэмэлт тунд хамрагдаж, "Спутник Лайт" вакциныг тариулсан бөгөөд биеийн байдал нь сайн байгаа гэдгийг дурджээ.

Гамалейн судалгааны хүрээлэнгээс өнгөрөгч 10 дугаар сард ОХУ-ын Эрүүл мэндийн яамнаас зөвшөөрөл авч, хамрын цацлага хэлбэрийн коронавирусийн эсрэг вакцины эмнэлзүйн туршилтын хоёр дахь шатыг эхлүүлээд байгаа билээ. Тус төвийн эрдэмтдийн хэлснээр энэхүү вакциныг ердийн тарилга хэлбэрийн вакцинтай хослуулж хэрэглэх юм.

Эх сурвалж: TASS

---