Нидерландын алдарт хөлбөмбөгчин Куинси Промес хүний амь нас хөнөөхийг завдсан болон танхайрсан хэргээр шүүхэд дуудагджээ. Тэрээр өнгөрсөн оны 7 дугаар сард гэр бүлийн гишүүнээ хутгалсан болох нь олон нийтэд ил болоод байсан юм.

Тус улсын "NOS" агентлагийн мэдээлснээр, Промес гэр бүлийнхээ үдэшлэгт оролцож байх үеэрээ үеэлтэйгээ маргалдан, улмаар түүнийг хутгалсан байна. Хохирогч нь өвдгөндөө хүнд гэмтэл авсан бөгөөд өнгөрсөн оны 11 дүгээр сард цагдаад гомдол гаргажээ.

Ингээд хууль хяналтынхан хөлбөмбөгчнийг өнгөрөгч 12 дугаар сард баривчлан, хоёр өдрийн турш саатуулж, хэргийн талаар байцаалт авсан билээ. Гэвч тэрээр бүх зүйлийг үгүйсгэсэн, өөрийгөө ямар ч гэм буруугүй гэж мэдүүлсэн аж.

Тэгвэл орон нутгийн прокурорууд Куинси Промесыг бусдын амь насыг хөнөөхийг завдсан болон танхайрсан хэргээр яллахаар шийдсэнээ өнгөрөгч пүрэв гарагт мэдэгджээ. Шүүх хурлын тов хараахан тодорхой болоогүй байгаа юм.

"NOS" агентлагийн мэдээлснээр, хүн хутгалсан хэрэгт 24-42 сарын хорих ял оноодог аж. 

Эх сурвалж: BBC

---