Туркийн Үндэсний хөдөлгөөний намын дарга Девлет Бахчели тус улсын Ерөнхийлөгч Режеп Тайип Эрдоганд бусад улс орны нутаг дэвсгэрийг багтаасан "Дэлхийн Түрэг угсаатнууд"-ын газрын зургийг бэлэглэсэн нь олон улсын дургүйцлийг хүргээд байна. Тус газрын зурагт Монгол Улсын баруун хэсэг багтжээ.

ОХУ-ын хэвлэлүүдийн мэдээлж буйгаар, "Түрэгийн ертөнц"-ийн газрын зурагт Оросын өмнөд хэсгийн Крым, Кубан, Ростов муж, Хойд Кавказын бүгд найрамдах улсууд болон Зүүн Сибирь зэрэг 20 орчим бүс нутгийг хамруулсан байна.

Газрын зураг дээр Турк, Азербайжан, Туркменистан, Узбекистан, Казахстан, Киргизстан, Тажикстан улсуудыг улаанаар тэмдэглэсэн бол Балканы хойгийн зарим улс, Ираны хэсэг, Оросын өмнөд бүс нутаг, Сибирийн ихэнх хэсэг болон Монголын баруун хэсгийг улбар шар өнгөөр ​​тэмдэглэжээ. Харин Алтай, Якут ба Шинжаан-Уйгурын өөртөө засах орныг шараар тэмдэглэсэн аж. Эдгээр тэмдэглэгээ нь юуг илэрхийлж байгаа талаар холбогдох хүмүүсийн зүгээс тайлбар өгөөгүй юм.

Туркчуудын бүтээсэн уг газрын зурагт бусад улс орны нутаг дэвсгэрийг хамаагүй дүрсэлсэнд зарим хүмүүс ихэд дургүйцэж байгаа билээ. Гэхдээ энэхүү газрын зураг нь ердөө түрэг хэлээр ярьдаг ард түмний байршлыг дүрсэлсэн төдий бөгөөд буруугаар ойлгохгүй байхыг Түрэг угсаатнуудын төлөөллүүд онцолж байна.

Эх сурвалж: РБК, Лента.Ру

---