Шинэ Зеландын оршин суугчдад 1212 оноос хойш 800 жилийн дараа анх удаа сарны хагас хиртэлтийг удаан хугацаанд харах боломж олджээ. Энэ баасан гарагийн шөнө сар хагас хиртэнэ гэж одон орон судлаачид мэдээлсэн байна.

Хиртэлт баасан гарагийн орой 20:20 минутаас эхлэх ба 22:00 цаг хүртэл саран дээр дэлхийн сүүдэр 97 хувьд нь тусах аж. Энэ үед сарны өнгө улайх ба сар хагас хиртэх үед байж болох хамгийн удаан хугацаанд ажиглах боломж оршин суугчдад бүрдэнэ гэж Оклэндийн Стардом ажиглалтын газрын одон орон судлаач Роб Дэвисон мэдэгджээ.

Ирэх 20 жилийн хугацаанд Шинэ Зеландын оршин суугчид 13 удаа сарны хиртэлтийг ажиглах боломж гарах юм байна. Эдгээрийн долоо нь өглөө эрт болох бөгөөд дөрөв нь шөнө дундад, хоёр нь энэ удаагийнхтай ижил оройн цагаар ажиглагдах ажээ.

Энэ баасан гарагийн сарны хиртэлт Шинэ Зеландаас гадна АНУ-ын хэд хэдэн мужид ажиглагдах юм байна.

Эх сурвалж: The Guardian

---