Үндэсний их баяр наадмын үндэсний бөхийн барилдаанд амжилттай оролцсон бөхчүүдэд цол олгох ёслол өнөөдөр Төрийн ордонд боллоо.

Тодруулбал, Монгол Улсын Ерөнхийлөгчийн 2021 оны есдүгээр сарын 17-ны өдрийн 40 дүгээр зарлигаар Үндэсний их баяр наадам, Тулгар төрийн 2228 жил, Их Монгол Улсын 813, Ардын хувьсгалын 98 жилийн ойн баяр наадмын үндэсний бөхийн барилдаанд ес давсан Н.Батсуурьт “МУ-ын Даян аварга” цол олголоо.

МУ-ын даян аварга Н.Батсуурь: Улсын даян аварга цолыг авсандаа баяртай байна. Энийг дааж, цаашид үндэсний бөхөө үлгэрлэн дуурайж, түмэн олныхоо итгэлийг алдахгүй хичээх болно. Цаг хугацаандаа шийдэгдэхгүй байсан допингийн асуудал одоо үнэн зөв шийдэгдсэнд баяртай байна.

МУ-ын заан Д.Анар: МУ-ын заан гэх эрхэм цолыг авсандаа баяртай байна. Миний бие сүүлийн гурван жил допинг хэрэглэсэн бөхчүүдтэй барилдаж, унасан байна. 10 гаран жилийн өдөр бүрийн ачаалалтай бэлтгэл, хөлс, хүч, гаргасан зардалаа бодвол өчнөөн юм болох байх. Допинг гэх зүйл монгол бөхөөс ангижрах байх гэж бодож байна. Миний хувьд олон жилийн хөдөлмөрөө үнэгүйдүүлсэнд харамсаж байна. Цаашид заалны барилдааны шинжилгээг сайн авах, допинг хэрэглэсэн бөхчүүдэд хатуу арга хэмжээ авах хэрэгтэй. 

Мөн Үндэсний их баяр наадмын бөхийн барилдаанд найм давсан Архангай аймгийн Цэнхэр сумын харьяат М.Бадарчид "Улсын гарьд" цол, долоо давсан Өмнөговь аймгийн Ханхонгор сумын харьяат "Говийн хүчтэн" дэвжээний бөх, Улсын начин Ц.Одбаярт "Улсын заан" цол, зургаа давсан Өвөрхангай аймгийн Зүүнбаян-Улаан сумын харьяат "Их Монголын хүчтэн" дэвжээний бөх, аймгийн арслан Б.Цэдэнсодномд "Улсын харцага" цол тус тус нөхөн олголоо. 

---