Шинэ Зеландын Пайк Ривер нүүрсний уурхайд 2010 оны 11 дүгээр сард хоёр ч хүчтэй дэлбэрэлт болсон. Дэлбэрэлт болох үед уурхайд 31 уурхайчин байсны ердөө хоёр нь амьд гарч чадсан бол үлдсэн 29 хүн харамсалтайгаар амиа алджээ.

Тэдгээр амиа алдсан уурхайчдын цогцсыг өнгөрсөн 11 жилийн хугацаанд гаргаж  чадаагүй учир уурхайн гүнд булшлагдсан юм. Тэгвэл цагдаа нар, аврагчид хоёр уурхайчны цогцсыг анх удаа камераар олж харжээ. Камерын тусламжтайгаар гурав дахь цогцос хонгилд байгааг харсан боловч тэдгээрийн алинд ч хүрэх боломжгүй гэж мэдээлсэн байна.

Арав гаруй жилийн хугацаанд хэн ч нэвтэрч чадаагүй Пайк Ривер уурхайн цооногийг дахин малтсанаар мэргэжилтнүүд уурхайн хамгийн гүний хэсгийн зургийг авах боломжтой болжээ. Мэргэжилтнүүдийн олсон цогцоснууд уурхайн орох хэсгээс нилээд зайтай газарт олдсон байна. Одоогоор эдгээр цогцоснууд таних ямар ч боломжгүй юм.

Түүнчлэн гэрэл зургаас харснаар 6-8 хүн ажиллаж байсан уурхайн хэсгийг олсон байна. Уг ажлыг удирдаж буй сайд Эндрю Литтл “уурхайчдын гэр бүлүүд биднийг илүү гүн рүү явж ажлаа үргэлжлүүлээсэй гэж хүсч байгааг ойлгож байна. Гэвч боломжгүй” хэмээн мэдэгджээ.

Шинэ Зеландын Засгийн газар 2017 онд уурхайчдын цогцсыг эрж хайх ажлыг дахин үргэлжлүүлэх төсөв баталсан ч энэ оны гуравдугаар сард цуцалсан байна. Уурхай дотор 2,2 км ухсан ч үр дүн гараагүй. Уурхайн малтлагыг үргэлжлүүлэх нь тун хэцүү бэрх, аюултайн дээр зардал ихтэй юм байна.

Эх сурвалж: ВВС

---