Канадын Бритиш Колумбиа мужийн Ванкувер хотод аюултай шуурга болж, их хэмжээний үер буун, хөрсний гулсалт үүссэний улмаас нэг хүн амиа алдаж, багадаа хоёр хүн сураггүй алга болоод байна. Түүнчлэн бүс нутгийн авто болон төмөр замын хөдөлгөөн тасалдаж, хотыг холбосон хоёр том хурдны зам эвдэрч, хаагджээ.

Өнгөрөгч даваа гарагт болсон хүчтэй шуурганы улмаас олон мянган хүнийг нүүлгэн шилжүүлэх шаардлагатай болсон бөгөөд Агассиз уулын хотын зам дээр боогдсон 300 орчим хүнийг нисдэг тэргээр аварсан аж. Мөн Меррит хотын нийт 7,000 оршин суугчийг бүгдийг нь хотоос гаргасан бөгөөд мягмар гарагт тус хотод цас орж, автомашинууд мөстэй үерийн усанд хөвөх болсон байна.

We’re with you, British Columbia. pic.twitter.com/mr6obVdKc2

— Canadian Forces in 🇺🇸 (@CAFinUS) November 15, 2021

Хөрсний гулсалтын улмаас нийт хэдэн автомашин урсан одож, нурангид дарагдаад байгааг албаныхан хараахан тогтоогоогүй байгаа ба эдгээр машины дотор зорчигчид нь байсан гэж эмээж байгаа юм. 

Ванкуверыг Канадын бусад хэсэгтэй холбодог хурдны замын нэг хэсэг үерийн усанд автсаны улмаас хэсэг хугацаанд тус хотоос гарах цорын ганц арга нь АНУ руу нэвтрээд, дараа нь Канад руу буцан орох явдал байжээ.

Бүс нутгийн Тээврийн сайд Роб Флеминг энэхүү цаг агаарын үзэгдлийг сүүлийн нэг зуунд тохиолдсон хамгийн аюултай шуурга гэж мэдэгдсэн байна.

Бритиш Колумбиа мужид өнгөрсөн зун хэт халалт болж, 500 гаруй хүн ​​амиа алдсан бөгөөд ой хээрийн түймэр дэгдэж, бүхэл бүтэн хот шатаж үгүй болсон билээ. Мөн энэ сарын эхээр тус мужид хар салхи дэгдсэн нь сүүлийн 50 жилийн хугацаан дахь анхны тохиолдол аж.

Эх сурвалж: BBC

---