Польшийн хилийн дагуух харуул хамгаалалтын албаныхан Беларусийн хил дээр байгаа цагаачид руу даралтат ус, нулимс асгаруулагч шүршсэн байна. Цагаач иргэд Польшийн хилийн хамгаалалтыг эвдэхийн тулд хог чулуу шиджээ.

Европын Холбооны улс орнууд руу цагаачлан гарахыг зорьсон мянга мянган цагаач хоёр улсын хил дээр хэдэн долоо хоногийн турш байрласаар байна. Тэдний дийлэнх нь Ойрхи Дорнодоос иржээ.

Европын Холбоо Беларусийн Засгийн газрыг цагаачдыг хил рүү явуулж, тогтвортой байдлыг санаатайгаар эвдэж байна хэмээн буруутгаад байгаа юм. Беларусийн Ерөнхийлөгч Александр Лукашенко өнгөрсөн зуны сонгуульд ялалт байгуулсныг холбооны орнууд эсэргүүцэж хориг тавьсны хариуд өс санасан үйлдэл гаргалаа хэмээн буруутгаж, хоригийг нэмж чангатгах шийдвэрт хүрсэн.

Польшийн хилийн харуул хамгаалалтын газраас өнгөрсөн жилийн хугацаанд хууль бусаар хил давах гэсэн оролдлого ердөө 88 бүртгэгдсэн бол сүүлийн нэг сарын хугацаанд 5,000 орчим гарсан гэж мэдээлжээ.

Хүүхдүүд, гэр бүлээ дагуулан ирсэн цагаачид хасах хэмийн хүйтэнд майханд хоноглон өдөр хоногийг аргацааж байна. Ойрын өдрүүдэд Беларусийн баруун хойд хот Гродногийн өмнөд хэсгээр Кузникад дахин хэдэн мянган цагаач иржээ.

Польшийн Батлан хамгаалах яамнаас цагаач иргэд хилийн тор эвдэж орохыг удаа дараа оролдсоор байгаа тул хилийн харуулууд хариу үйлдэл үзүүлсэн хэмээн мэдээлжээ. Цагаач иргэд тэсвэр алдан цэргүүд рүү мод чулуу шидсэн гэжээ. Тархиндаа гэмтэл авсан харуулын офицер эмнэлэгт хүргэгдсэн байна.

Беларусийн хүчин цагаачдыг өдөөн хатгаж, зэвсэглэхэд тусалж байна гэж Польшийн тал буруутгалаа. Беларусийн ойрын холбоотон ОХУ Польшийн цэргүүд цагаачид руу нулимс асгаруулагч, даралтат ус шүршсэн явдлыг байж боломгүй үйлдэл хэмээн зэмлэжээ.

Эх сурвалж: ВВС

---