Коллежийн нэг ангийн найзтайгаа хайр сэтгэлийн холбоо үүсгэж, гэрлэхийн тулд хааны удмын өндөр дээд цол хэргэмээсээ татгалзсан Мако гүнж нөхөртэйгээ хамт эгэл даруу амьдрахаар АНУ-д иржээ. Өнгөрсөн сард гэрлэсэн гүнж Мако ням гарагийн өглөө Токиогийн нисэх буудлаас хөөрсөн байна.

Мако гүнж Комуротой гэрлэхдээ цол хэргэмээ хураалгахаас гадна хааны удмыг орхиж буй хүмүүст нэг удаа олгодог мөнгөн тусламжаас ч татгалзсан юм. Шинэхэн, залуухан хос Комурогийн ажилладаг хуулийн фирм байрладаг Нью-Йорк хотод орон сууц түрээслэхээр болсон байна.

Японы хуулиар хааны удмын эрчүүд энгийн ардтай гэрлэж болдог ч эмэгтэйчүүд энгийн ардтай гэрлэхээр бол цол хэргэмээ хураалгадаг уламжлалтай.

Мако гүнжийг нөхөртэйгээ АНУ руу нисэх үед Токиогийн нисэх буудал дээр 100 орчим сэтгүүлч, сурвалжлагч цугларсан бөгөөд гүнжийг аюулгүйн албаныхан, цагдаа нар хамгаалсан байна. Тэд хэвлэлийн ажилтнуудын асуултад хариулахаас татгалзжээ. Хосыг Нью-Йоркод газардсаны дараа ч мөн нисэх буудлын ажилтнууд хамгаалсан байна.

Хэдхэн жилийн өмнө Их Британийн ханхүү Харри эхнэр Меган Мэрклийн хамт хатан хааны ордныг орхин өөрсдийнхөөрөө амьдрахаар мөн Америкийг зорьсон. Гүнж Мако болон түүний нөхөр Комуро нарыг Японы Харри, Меган хэмээн хочлох болжээ.

Эх сурвалж: ВВС

---