Перугийн шинэ Ерөнхийлөгч Педро Кастилло тус улсын Ерөнхийлөгчийн нисэх онгоцыг зарж, орлогыг нь эрүүл мэнд, боловсролын салбарын санхүүжилтэд зориулна гэж мэдэгджээ.

Тэрээр Ерөнхийлөгчийн албан тушаалыг хашсан анхны 100 хоногоо тохиолдуулан үүнийг мэдэгдсэн бөгөөд мөн төрийн албан хаагчдыг нэгдүгээр зэрэглэлээр нисэхийг хориглоно гэсэн байна.

Гэвч энэхүү хуучин онгоцыг зарах нь амаргүй ажил юм. Өмнө нь, тус улсын Ерөнхийлөгч асан Алан Гарсиа тус онгоцыг хоёр удаагийн дуудлага худалдаагаар оруулсан хэдий ч зарж чадаагүй билээ. Үүний нэг шалтгаан нь, тухайн үед "Боинг"-ийн уг онгоцыг 18.5 сая ам.доллароор санал болгож байжээ. Перугийн хэсэг албан тушаалтан согтууруулах ундаа хэрэглэсэн үедээ тус онгоцоор Испанид нислэг үйлдсэн гэх мэдээлэл гарсны дараа Ерөнхийлөгчийн онгоц нь "Үдэшлэгийн онгоц" гэх нэртэй болсон бөгөөд Алан Гарсиа энэ дуулианы улмаас онгоцыг зарах гэж оролдсон юм.

Харин энэ удаа Кастиллогийн оролдлого амжилттай болно гэж олон хүн найдаж байна. 90-ээд оны дундуур Ерөнхийлөгч асан Альберто Фухиморигийн худалдаж авсан тус онгоц зарагдах юм бол ашиг нь хүүхдийн эрүүл мэнд, боловсролд зориулагдах аж. Перугийн эрүүл мэндийн систем коронавирусийн цар тахлын улмаас хүнд цохилтод ороод байгаа билээ.

Ерөнхийлөгч Педро Кастилло мөн ирэх 12 дугаар сарын 1-нд тус улсын хөдөлмөрийн хөлсний доод хэмжээг 7.5 хувиар нэмэгдүүлнэ гэж амлаад байгаа юм.

Эх сурвалж: BBC

---