Беларусь, Польш улсуудын хил дээр гацсан мянга мянган дүрвэгсдийн хямралд Европын Холбооны орнууд Беларусийг буруутгаж, хориг арга хэмжээгээ чангатгахаа мэдэгдсэн. Беларусийн 30 орчим бизнес эрхлэгч, томоохон компаниудын эсрэг нэмж хориг тогтоож болзошгүй байна.

Үүний хариуд Беларусийн Ерөнхийлөгч Александр Лукашенко ОХУ-аас Европ руу хий дамжуулдаг Ямал-Европ дамжуулах хоолойг хааж чадна гэдгээ анхааруулжээ. Олон улсад эрчим хүчний хямрал хурцадсантай холбоотойгоор хийн үнэ өнгөрсөн сараас огцом өсөөд байгаа юм.

Лукашенко сайд нарын хуралдаан дээр “Бид Европыг халааж байна. Тэд хилээ хаана гэж биднийг заналхийлсээр байна. Хэрэв бид байгалийн хийн дамжуулалтаа зогсоочихвол яах бол. Польш, Литва улсуудын удирдагчид болон бусад тархигүй хүмүүст ярихаасаа өмнө бодож бай гэж зөвлөе” гэжээ.

Энэ хооронд Польшийн нийслэл Варшав хотод Тусгаар тогтнолыг өдрийг угтаж мянга мянган иргэн жагсаал хийсэн байна. Жагсагчдын дунд дүрвэгсдийг хил нэвтрүүлэхгүй байхыг уриалсан хэт барууны үзэлтнүүд ч багтжээ. Польшийн хэвлэлүүдийн мэдээлснээр лхагва гарагт 468 удаа хууль бусаар хил нэвтрэх гэсэн оролдлого гарсан гэжээ. Ихэвчлэн Ойрхи Дорнодоос ирсэн цагаач иргэд хилийн төмөр торыг тайрах зэргээр нууцаар хил давахыг оролдсон байна.

Беларусьтай хиллэдэг бусад орнууд хил орчмын бүсийн уг хямрал нь цэргийн мөргөлдөөнд хүргэж болзошгүй гэдгийг анхаарууллаа.

Эх сурвалж: The Guardian

---