Японы галт тэрэгний жолооч ажил олгогч ЖР Вест компанийг шүүхэд өгч сэтгэл санааны хохирол учруулсных нь төлөө 2,2 сая иен нэхэмжилжээ. Тус компани жолоочийг ээлж солих хооронд нэг минут хоцорсных нь төлөө цалинг нь хасч ердөө 56 иен буюу 49 центийн цалин өгсөн байна.

Ажилтны хэлж байгаагаар галт тэрэгний хуваарийг нэг минут хоцроосноос галт тэрэгний үйл ажиллагаа огт саатаагүй гэжээ. Уг явдал 2020 оны зургадугаар сард болсон бөгөөд цалинг нь хассанаас болж ажилтан сэтгэл санаагаар багагүй хохирсон хэмээн мэдэгджээ.

Японы Сораньюс24 сайтад мэдээлснээр галт тэрэгний жолооч Окаяамагийн буудал дээр хоосон галт тэрэг жолоодох ёстой байсан боловч өмнөх жолоочтой ээлж солилцох үедээ буруу байрлалд хүлээсэн байжээ. Тухайн үед алдаагаа ойлгон зөв газартаа очиход хоёр минут зарцуулж, үүнээс болж галт тэрэг хуваариасаа нэг минут хоцорсон байна.

ЖР Вестийн цалинг нь ердөө 49 цент болгож хассан явдлыг хүлээж авахаас татгалзаж, галт тэрэг хоосон байсан тул зорчигчдод болон галт тэрэгнй үйл ажиллагаанд ямар нэг гэм хохирол учраагүй гэж үзэн маргаан эхэлжээ. Гэвч ажил олгогч копанийн зүгээс  ажилчдыг хоцрох болон шалтгаангүйгээр ажил тасалсан тохиолдолд цалин хөлсийг нь олгохгүй гэж үзсэн байна.

Жолооч энэ жилийн гуравдугаар сард Окаяамагийн дүүргийн шүүхэд маргаанаа шийдвэрлүүлэхээр гомдол гаргасан байна. Япон улсад галт тэрэгний систем нарийн чанд дэг журамтай, найдвартай үйл ажиллагаатай гэдгээрээ алдартай.

2017 онд галт тэрэг 20 секунд хоцорсны төлөө үйл ажиллагаа эрхлэгч компани олон нийтээс албан ёсоор хүлцэл өчиж байжээ. Хэрэв галт тэрэг тав болон түүнээс урт хугацаагаар хоцорвол зорчигчдыг хоцроосныхоо төлөө албан ёсоор баримт бичиг үйлдэж, хүлцэл өчдөг байна.

Эх сурвалж: ВВС

---