Засгийн газрын ээлжит хуралдаанаар хэлэлцсэн асуудлуудыг танилцуулж Шадар сайд С.Амарсайхан, Сангийн сайд Б.Жавхлан, ХХААХҮ-ийн сайд З.Мэндсайхан, нийслэлийн Засаг дарга Д.Сумъяабазар нар мэдээлэл хийлээ.

Засгийн газрын өнөөдрийн хуралдаанаар Төрийн өмчит аж ахуйн нэгжүүдийн бүтцийн өөрчлөлтийн хүрээнд 100% төрийн өмчид байх шаардлагатай стратегийн ач холбогдолтой 30 гаруй компанийн жагсаалтыг танилцуулж, Засгийн газраас бодлогоор дэмжин ажиллахаар болсныг Сангийн сайд Б.Жавхлан танилцууллаа.

Сангийн сайд Б.Жавхлан

-Сангийн яамны зүгээс төрийн өмчийн байгууллага зохицуулалтын газартай хамтран дараах асуудлыг оруулсан байгаа. Төрийн өмчийн үйлдвэрийн газрууд, төрийн өмчийн оролцоотой ААН-үүдэд бүтцийн өөрчлөлт хийх талаар төлөвлөгөө гаргаад судалгааны ажил үндсэндээ дуусах дөхөж байна. Гурван чиглэлийн бүтцийн өөрчлөлт оруулна. Тэгэхээр энэ бүтцийн өөрчлөлтөөр стратегийн хувьд улсдаа чухал ач холбогдолтой төрийн мэдэлд 100 хувь байх шаардлагатай ААН-үүдийг зарлаж тогтвортой бодлогоор засгийн газар дэмжиж ажиллана гэсэн байдлаар эхний танилцуулга хийсэн байгаа гэлээ.

Үүнд:

• Эрдэнэт үйлдвэр
• Монголросцветмет
• Эрдэнэс Оюутолгой
• Улаанбаатар дулааны сүлжээ
• Деспитчерийн үндэсний төв
• Хөшигийн хөндийн нисэх онгоцны буудал
• Газрын тос боловсруулах үйлдвэр
• Орон нутгийн болон нийслэл дэх ДЦС-ууд
• Төрийн орон сууцны корпорац
• Эгийн голын УЦС
• Тавантолгой түлш
• Авто тээврийн үндэсний төв
• Дипломат байгууллагын үйлчилгээг эрхлэх газар
• Барилгын хөгжлийн төв
• Улаанбаатар төмөр зам
• Монголын төмөр зам
• Хөгжлийн банк
• Орон нутгийн АЗЗА 
• Дулаан, цахилгаан түгээх компаниудыг бодлогоор дэмжих санал гаргасан тогтоол удахгүй гарна гэдгийг хэллээ.

Төрийн өмчит компаниудын бүтцийг

• Стратегийн хувьд 100 хувь төрд байх шаардлагатай
• Хувьцаат буюу хөрөнгийн бирж рүү шилжүүлж, олон нийтэд хувьцаа гарган, засаглалыг сайжруулах боломжтой
• Өгөөжгүй, цаашдаа төрийн өмчид байх шаардлагагүй гэсэн гурван чиглэлээр хийж байгаа ба үлдсэн хоёр ангилалд багтах аж ахуйн нэгжүүдийг удахгүй Засгийн газрын хуралдаанд танилцуулах юм байна.

---