Украйн улсад өнгөрөгч бямба гарагт коронавирусийн халдварын улмаас 793 хүн нас барж, нэг өдөрт бүртгэгдсэн амиа алдагсдын тоо шинэ дээд хэмжээндээ хүрчээ.

Тус улсад сүүлийн хэдэн долоо хоногт цар тахлын халдварын томоохон давлагаа дэгдэн, санхүүжүүлэлт нь дутмаг эмнэлгийн тогтолцоо нь хүнд байдалд ороод байгаа юм. Эрүүл мэндийн яамны мэдээлснээр, бямба гарагт халдварын 25,063 шинэ тохиолдол бүртгэгдсэн байна. 

Одоогийн байдлаар Украйнд дөрвөн өөр төрлийн коронавирусийн эсрэг вакцин тарьж байгаа хэдий ч тус улсын 41 сая хүн амын дөнгөж 17.9 хувь нь дархлаажуулалтад бүрэн хамрагдаад байгаа аж. Энэ нь Европт Арменийн дараа орох хамгийн бага үзүүлэлт юм.

Орон нутгийн эрх баригчид халдварын тархалтыг зогсоохын тулд багш, төрийн албан хаагч болон бусад ажилтныг энэ сарын 8-ны дотор вакцинд бүрэн хамрагдахыг шаардсан бөгөөд үгүй бол цалинг нь өгөхгүй гэж мэдэгдсэн байна. Үүнээс гадна, иргэд нисэх онгоц, галт тэрэг, холын зайн автобус зэрэгт суухдаа вакцины бичиг эсвэл шинжилгээний "Сөрөг" хариугаа харуулах шаардлагатай аж.

Гэвч украйнчуудын зүгээс эдгээр шинэ хязгаарлалтыг шүүмжлэн, энэ долоо хоногийн эхээр нийслэл Киевт эсэргүүцлийн жагсаал зохион байгуулжээ.

Өнөөдрийг хүртэл тус улсад нийт гурван сая гаруй халдварын тохиолдол бүртгэгдэж, 71,635 хүн нас бараад байна.

Эх сурвалж: AP

---