Хятадын хойд болон зүүн хойд бүс нутаг, ӨМӨЗО-ы нутаг дэвсгэрт Оросын Сибирийн хүйтэн урсгал хүрч, цасан шуурга болсон байна. Их хэмжээний цас орж, цасаар шуурсны улмаас Тунляо хотод нэг хүн амь эрсдэж, 5,600 гаруй иргэн цасан шуурганд өртжээ.

Цасан шуурга Тунляо хотын найман дүүрэгт баасан гарагаас эхэлж шуурсан байна. Цаг агаарын онц байдлын улмаас 35 сая юанийн эдийн засгийн хохирол учирсан гэж CCTV мэдээлжээ. Шуурганы улмаас ням гараг хүртэл гурав хоногийн турш улаан түвшний аюул зарласан байна.

Тунляо буюу Байшинт хотод цасны зузаан 50 см, зарим нутагт нэг метрт хүрчээ. Цасан шуурганы дараа ӨМӨЗО-ы олон хотод авто замууд мөстөж, машинууд боогдон, нисэх буудлууд хаалгаа барьж, сургууль цэцэрлэгийн үйл ажиллагааг түр зогсоосон байна.

Мөн Хятадын умард нутгийн Лиаонин мужийн Шэньян хотод цаг агаар огцом хүйтэрч, цасан шуурга болжээ. Үүний улмаас хүлэмжийн тариа ногоо, гахайн фермийн үйл ажиллагаа сүйтсэн байна. Түүнчлэн хөрш Жилин мужийн нийслэл Чанчун хотод метроны сүлжээ саатаж, боловсролын байгууллагуудын үйл ажиллагааг түр зогсоожээ.

Цаг уур судлаачид Сибириэс орж ирсэн цаг агаарын хүйтэн урсгал Хятадын өмнөд нутаг руу чиглэж, дахин 10 хоног үргэлжилнэ хэмээн таамаглаж байна.

Эх сурвалж: Global Times

---