Японы Фукуи мужийн загас агнуурын боомтын дуудлага худалдаагаар цасан хавч 800 мянган иен буюу ойролцоогоор 7,000 ам.долларын үнэд хүрчээ. Энэхүү дуудлага худалдаа болсон өнгөрөгч бямба гарагт Японы тэнгис дэх цасан хавчийг барих улирал эхэлсэн юм.

Фукуи мужийн засаг захиргаанаас "Кивами" гэх брэндийн дор худалдаалдаг цасан хавч нь энэ удаагийн дуудлага худалдаагаар хамгийн өндөр үнэд хүрсэн байна.

Тус хавчийг худалдаж авсан орон нутгийн рестораны эзэн "Толгойгоо өндөрт өргөн, үйлчлүүлэгчдээ угтан авахыг хүссэн" гэжээ.

Мужийн эрх баригчид 2015 оноос хойш жин, харагдах байдал зэрэг брэндийн шалгууруудыг хангасан цасан хавчнуудыг тусгайлан сонгон, "Кивами" нэрийн дор зарж байгаа билээ. Сүүлийн нэг жилийн хугацаанд 67 цасан хавч буюу нийт агнуурын 0.04 хувь нь "Кивами хавч" гэсэн тусгай гэрчилгээг авчээ.

Эх сурвалж: KYODO

---