Дэлхий дахинд коронавируст цар тахал тархсаны дараа нэг удаагийн хамгаалалтын хувцас хэрэглэлийн хэрэгцээ шаардлага огцом нэмэгдсэн. Үүнтэй холбоотойгоор 25,900 тн буюу хоёр давхар 2,000 ширхэг автобустай тэнцэхүйц хэмжээний нийлэг болон хуванцар хог хаягдал далай тэнгисийн усанд хаягджээ.

Эдгээр хог хаягдлын дийлэнхийг нэг удаагийн амны хаалт, бээлий эзэлж байгаа ажээ. Цар тахал эхэлснээс хойш 193 улсад 8,4 сая тн хуванцар болон нийлэг хаягдал үүссэн гэх судалгааг Нанжин их сургуулийн эрдэмтэд хийжээ. Имин Пен болон Пейпей Ву нарын судалгаа PNAS цахим сэтгүүлд хэвлэгдсэн байна.

Их хэмжээний хуванцар, нийлэг хаягдал 400 орчим гол мөрнөөр дамжин далай тэнгист тээвэрлэгдсэнээр далай тэнгисийн ан амьтдыг гэмтээх, хөнөөх эрсдэлтэй гэдгийг уг судалгаагаар сэрэмжлүүлжээ. Энэ жилийн гуравдугаар сард Нидерландийн Лейдэнд эмнэлгийн зориулалттай нэг удаагийн бээлийнд гацсан загаснууд олноороо олдож байжээ. Мөн Бразил улсад үхсэн оцон шувууны гэдсэн дотроос амны хаалт гарч ирсэн тохиолдол бий.

Хятадын эрдэмтдийн хийсэн судалгаагаар тэдгээр замбараагүй хаягдсан хуванцар, нийлэг хаягдлын 46 хувь нь Азийн орнуудаас, 24 хувь нь Европоос, 22 хувь нь Умард болон Өмнөд Америк тивийн орнуудаас иржээ. Азийн орнуудад цар тахлын үед амны хаалт зүүж, бээлий өмсөж хамгаалах тохиолдол бусад тивтэй харьцуулахад өндөр байгаа юм. Түүнчлэн нийт хаягдлын 87,4 хувь нь эмнэлгүүдээс ирж байна гэжээ.

Эх сурвалж: The Guardian

---