АНУ-ын "Пфайзер" компанийн боловсруулсан коронавирусийг эмчлэх туршилтын эм нь эмнэлэгт хэвтэх эсвэл нас барах зэрэг халдварын хүндрэлийн эрсдэлийг 89 хувиар бууруулдаг болох нь тогтоогджээ.

Тус компанийн Гүйцэтгэх захирал Альберт Бурла энэ талаар мэдэгдсэн бөгөөд энэхүү эмийг аль болох хурдан дэлхий даяар түгээнэ гэж амласан юм. "Паксловид" гэж нэрлэсэн уг эмийн эмнэлзүйн туршилтын үр дүнг энэ сарын 25-наас өмнө АНУ-ын Хүнс, эмийн удирдах газарт танилцуулах ба энэ оны эцэс гэхэд зохицуулагч байгууллагуудын зөвшөөрлийг авахаар төлөвлөж байна.

Ерөнхийлөгч Жо Байдены хэлснээр, АНУ-ын Засгийн газар тус эмийн олон сая тунг авахаар баталгаажуулаад байгаа аж. "Пфайзер" компани мөн шинэ эмээ нийлүүлэх гэрээний талаар 90 улстай хэлэлцэж байгаа гэжээ.

"Паксловид" эмийг одоо хэрэглэж буй "Ритонавир" хэмээх вирусийн эсрэг эмтэй хавсарч хэрэглэх бөгөөд эмчилгээний хүрээнд өдөрт хоёр удаа гурван шахмал уух аж. "Пфайзер" компани энэ оны эцэс гэхэд 180 мянган эмчилгээний курс, ирэх оны эцэс гэхэд дор хаяж 50 сая курс эм үйлдвэрлэхээр зорьж байгаа юм.

Эх сурвалж: Reuters

---