Беларусийн "Гродно" агаарын тээврийн компанийн "Антонов-12" ачааны нисэх онгоц Эрхүүгийн ойролцоох Пивовариха тосгонд осолдож, багийн долоон гишүүн бүгд амиа алджээ. Гэвч аврагчид одоогоор зөвхөн таван хүний цогцсыг олоод байгаа бөгөөд 100 хүний ​​бүрэлдэхүүнтэй аврах баг үргэлжлүүлэн ажиллаж байгаа аж.

"Антонов-12" онгоц нь өнгөрөгч лхагва гарагийн 14:45 цагт Эрхүү хотод газардах гэж байхдаа радараас алга болсон байна. Үүний дараа албаныхан онгоцны хэлтэрхийнүүдийг Пивовариха тосгоны ойролцоогоос олжээ.

Ослын дараа онгоц шатсан бөгөөд асгарсан түлш 300 кв.метр талбайг хамарсан аж. Одоогоор галыг бүрэн унтраасан гэж албаны эх сурвалж мэдээлжээ.

Харамсалтай нь, онгоцны зорчигчдоос амьд үлдсэн хүн байхгүй гэж Эрхүү мужийн захирагч Игорь Кабайерв мэдэгдсэн байна. Эрх баригчдын мэдээлснээр онгоцонд зөвхөн багийн гишүүд байсан бөгөөд тэд ОХУ, Беларусь, Украйны иргэд байжээ.

Ослын шалтгаан хараахан тодорхой болоогүй байгаа бөгөөд мөрдлөгийн ажил үргэлжилж байгаа юм. Эрхүүгийн нисэх онгоцны буудлын хэвлэлийн төлөөлөгч Клим Куликовын хэлснээр, онгоц үзэгдэх орчин муутай, их хэмжээний нойтон цастай үед газардах гэж оролдож байсан аж.

Эх сурвалж: TASS

---