БНХАУ-ын нийслэл Бээжин хотын дунд сургуулийн ажилтнаас коронавирусийн халдвар илэрсэн байна. Сургуулийн ажилтнаас Ковид илэрсний дараа сургуулийг бүхэлд нь битүүмжлэн тусгаарлажээ.

Тус сургуульд сурдаг сурагчдын эцэг эхчүүд гадаа цуглаж, сэтгэл түгшин шөнө дунд хүртэл мэдээ хүлээсэн байна. Хүүхдүүдийг коронавирусийн эсрэг шинжилгээнд хамруулсан бөгөөд шинжилгээний дүн гарах хүртэл тэднийг тусгаарлажээ.

ВВС агентлагийн мэдээлснээр сургуульд түгжигдсэн хүүхдүүд 7-12 насны сурагчид байсан байна. Халдвар аваагүй хүүхдүүдийг маргааш өдөр нь гаргах ч эрсдэлтэй хүүхдүүдийг үргэлжлүүлэн тусгаарлана гэсэн мэдээг сургуулийн гадаа хүүхдүүдээ хүлээж буй эцэг эхчүүдэд шөнө дундын үед өгчээ. Мөн хүүхдүүд хонох шаардлагатай болсон тул хувцас хунарыг нь авчрахыг хүссэн байна.

Орон нутгийн зарим эх сурвалжийн мэдээлснээр тус сургуулийн 35 сурагч үрглэлжлүүлэн тусгаарлагдахаар болжээ. Сургуулийн үйл ажиллагааг түр зогсоосон ба багш сурагчид, албаны ажилтнуудын нэгийг ч үлдээлгүй шинжилгээ авсан байна.

Ковид-19 тархсан хоёр жил орчмын хугацаанд Хятад Ковидгүй улс болохыг зорьж, хатуу чанга хөл хорионы дэглэм, бүх нийтийг шинжилгээнд хамруулах бодлогыг баримталсаар ирсэн. Австрали, Өмнөд Солонгос, Сингапур зэрэг улсууд эхэндээ Хятадтай ижил бодлого баримталсан ч эцэст нь коронавирусийг орон нутгийн шинжтэй өвчлөл гэсэн ойлголттойгоор нийгэм, эдийн засгийн бодлогоо тодорхойлох болсон юм.

Эх сурвалж: ВВС

---