Өмнөд Суданы Жуба олон улсын нисэх онгоцны буудлаас хөөрөөд удаагүй байсан ачааны нисэх онгоц мягмар гарагийн өглөө осолдож, дор хаяж таван зорчигч нас баржээ.

Амиа алдсан хохирогчдын дунд хоёр украин, хоёр судан болон нэг өмнөд судан иргэн байсан бөгөөд тэдний дөрөв нь нисэх багийн гишүүн байсан аж. Осолдсон ачааны онгоцыг Өмнөд Суданд бүртгэлтэй орон нутгийн агаарын тээврийн "Euro Airlines" компани ажиллуулж байсан юм.

Жуба олон улсын нисэх онгоцны буудлын Ерөнхий захирал Кур Куолын хэлснээр, уг онгоц нь нийслэл Жубагаас Мабан хот руу шатахуун тээвэрлэж байжээ. Тэрээр "Ослын шалтгаан одоогоор тодорхойгүй байна. Ослын нарийн шалтгааныг тогтоох хороог байгуулах шаардлагатай тул цаг хугацаа хэрэгтэй" хэмээсэн байна.

Өмнөд Судан улсад агаарын тээврийн аюулгүй байдлын асуудал түгээмэл гардаг бөгөөд сүүлийн 10 жилийн хугацаанд хэд хэдэн онгоц осолдсон билээ. 

Эх сурвалж: BBC

 

---