Афганистан улсад Талибаны зэвсэгт бүлгийн гишүүд хуримын зочдыг буудаж хороосон хэрэг гарчээ. Талибаны төлөөлөгч Забихуллах Мужахидын хэлснээр гурван этгээд зочид руу гал нээхээсээ өмнө өөрсдийгөө Талибаны гишүүд хэмээн зарласан гэжээ. Гал нээсэн хоёр этгээдийг баривчлан хэргийн мөрдөн шалгах ажлыг явуулж байгаа бөгөөд нэг этгээд зугтсан байна.

Хуримын хүлээн авах хэсэгт хөгжим тоглож байсан зочдыг зэвсэгт этгээдүүд хөгжим тоглохоо боль хэмээн шаардсан байна. Татгалзсан иргэд рүү гал нээжээ. Орон нутгийн зарим хэвлэлийн мэдээлснээр Талибаны бүлгийн гишүүдийн нээсэн галд хоёр хүн амиа алдаж, 10 хүн гэмтэж шархадсан байна.

Талибаны төлөөлөгч “хөгжим тоглохоо больсонгүй гэж хэн нэгнийг буудах эрх мэдэл Исламын Эмиратын хэнд ч байхгүй” гэдгийг тодорхой сануулжээ. Хэдий тийм боловч хуримын ёслол, олон нийтийн арга хэмжээнд дуу хөгжим тоглохыг талибчууд төдийлөн сайшаадаггүй байна.

Өнгөрсөн наймдугаар сард Афганистаны нийтийн дуучин Фавад Андарабиг гэрээс нь авч яван Талибаны зэвсэгт бүлгийн гишүүд амь насыг нь хороосон явдал гарчээ. Мөн хөгжимчдийг хөгжмөө тоглохгүй байхыг шаардсан явдал хэд хэдэн удаа гарсан тухай эх сурвалжид дурдсан байна.  

Талибанчууд 1996-2001 оны хооронд Афганистаны төрийн эрхийг барьж байхдаа исламын шашинд хамааралгүй бусад төрлийн дуу хөгжим тоглохыг хориглож байжээ.

Эх сурвалж: CNN

---