Найман настай Э.Ананд хүү монголчуудынхаа цуглуулсан хандиваар эмчилгээгээ хийлгэхээр БНСУ-ыг зориод чамгүй хугацаа өнгөрөөд байна. Хүү багана нурууны түрж ургасан хүнд хэлбэрийн хавдартай болох нь тогтоогдсон. Харамсалтай нь БНСУ дахь эмнэлэгт үзүүлсний дараа цусны хорт хавдартай болох нь тогтоогдож, эмчилгээ хийлгэж буй. Гэвч өчигдрөөс Э.Ананд хүүг эдгэрсэн гэх ташаа мэдээлэл цахим ертөнцөд гарсан. Ингээд Э.Анандын ээж Ц.Даваатай хүүгийнх нь биеийн байдал, эмчилгээний үр дүнгийн талаар утсаар холбогдон ярилцлаа.

-Цахим хэрэгслээр Э.Ананд хүүг бүрэн эдгэрсэн гэх мэдээлэл явах боллоо. Гэвч та өөрийн цахим хаягтаа бүрэн эдгээгүй дахиад ч эмчилгээ хийлгэж байгаа гэсэн байна. Эмчилгээний явцын талаар дэлгэрэнгүй мэдээлэл өгөөч?

-Дөрөв дэх хими эмчилгээ дуусаж, долоо хоног завсарлаад өчигдөр эмнэлэгтээ буцаж хэвтсэн. Өнөөдрөөс тав дахь химийн эмчилгээндээ орох гэж байна. Анхнаасаа би хэлж байсан, зургаан удаагийн хими эмчилгээнд орно гэж. Үүний дараа дахиж, шинжилгээ аваад үүдэл эс суулгах шаардлагатай эсвэл хавдрын эс маань хими эмчилгээндээ дарагдсан эсэхийг зургаан удаагийн хими эмчилгээний дараа тодорхой болно. Хүмүүсийн яриад байгаа нурууны хавдар бол эхний хими эмчилгээ дуусаад MRI хийсэн. Монголд харуулсан МRI-тай харьцуулж харсан. Ингээд энэ эмчилгээ цусандаа ч нуруундаа ч хими эмчилгээ тохирч байгаа учраас эмч нар нуруунд хагалгаа хийх шаардлага гарахгүй юм байна. Зургаан хими эмчилгээний дараа нурууны хавдар нь устчих учраас үүдэл эсийн хагалгаанд орно нь гэж санаа зовох шаардлагагүй шүү гэж тухайн үед хэлж байсан.

-Тэгэхээр хими эмчилгээ үр дүнтэй байгааг илтгэсэн ч дахин хоёр удаагийн эмчилгээ үлдэж байгаа юм байна тэй. Тэгэхээр хандивын үйл ажиллагаа ч зогсоогүй биз дээ?

-Тийм ээ. Нэг хими эмчилгээ нэг сар болдог. Өнөөдрийн эхэлсэн хими 12 сарын эхээр дуусна. Дунд нь 7-10 хоног завсарлана. Тэгээд үлдсэн зургаа дахь хими эмчилгээндээ орно. Эмчилгээ дуусаагүй тул хандивын үйл ажиллагаагаа зогсоогүй байгаа.

-Өнөөдрийн байдлаар нийт хандивын дансанд хэдэн төгрөг цугларласан бэ. Цаашид хими эмчилгээний зардал хэдэн төгрөг болох бол?

-Дөрвөн удаагийн хими эмчилгээний дундуур нэг удаагийн нөхөн сэргээх эмчилгээ хийлгэсэн. 200 гаруй сая вон буюу монгол мөнгөөр 400 гаруй сая төгрөг болсон.

Монголд оношоо буруу тодорхойлсон зэрэг гээд зардал мөнгөө буруу тооцож ирсэн. Нийт хандивын дансанд 390-ээд сая төгрөг цугларсан энэ маань зарцуулагдаад дуусаж байна.

Зургаан хими эмчилгээний дараа хавдрын эс маань үлдсэн байвал дараагийн арга хэмжээ бол үүдэл эс шилжүүлэн суулгана. Хүүхэд өөр өөртөө донор болбол хамаагүй хямд. Өөрөө донор болж чадахгүй бол 100 сая вон шаардлагатай.

Харин хими эмчилгээний дараа хавдрын эс үлдээгүй бол нөхөн сэргээх эмчилгээ хийлгэнэ. Ямар дасгал, хэдэн минут орсноос хамаараад үнэ өртөг нь өөр байна. Солонгос талын эмнэлгээс бид хоёрт эмчилгээ дууслаа гэхэд бүх эмчилгээний зардлаа төлж барагдуулсан байгаарай гэсэн. Ингэснээр эмчилгээний хооронд бага, багаар мөнгөө байршуулах боломж олгож байгаа.

-Тэгэхээр тав, зургаа дэх хими эмчилгээний зардал та бүхэнд цуглараагүй гэж ойлгож болох уу?

-Цуглаагүй. Одоо ч гэсэн хандивын аян маань үргэлжилж байгаа. Эхний хоёр хими маш өндөр зардалтай гарсан. Эхний хоёр хими эмчилгээ нийлээд 120 сая вон болсон нэг хими нь 120 сая төгрөг гэж бодоод яанаа барахгүй юм байна даа гэж бодсон. Тэгж байтал гурав дахь хими 36 сая вон дөрөв дэх 30 сая вон болсон. Эхний хоёр хими хамгийн чухал эмчилгээ байсан. Хавдрын эсийг үгүй болгох байсан учраас өндөр дүнтэй байсан. Үлдсэн хими эмчилгээ бол дахиж хавдрын эсийг сэргээхгүй эмчилгээ гэж ойлгож болно.

Тэгэхээр одоо хими эмчилгээ, нөхөн сэргээх гээд 100 сая төгрөг бол нэн зайлшгүй хэрэгтэй байгаа гэсэн үг. Хүүгийн маань биеийн байдал сайжирч байгаа хоол ундандаа орсон.

Хандив олохоор хэд хэдэн сан руу холбогдож байна. Германы сангууд байдаг юм байна. Даанч өнгөрсөн жилүүдэд хүүхдийн хандивын мөнгийг хувьдаа ашигласан гээд тухайн сангаас манай улсыг хар жагсаалтад оруулсан байсан. Тус сангаас энэ онд манай улсад хандив тусламж өгөхгүй гэсэн.

Монголынхоо ард иргэдэд чин сэтгэлээсээ баярлаж явдаг шүү. Худал мэдээлэл битгий тараагаасай. Ядаж Э.Ананд хүүд хоёр хими эмчилгээ үлдсэн тул монголчууд маань дэмжээд өгөөрэй гээд мэдээлэл оруулж өгөөч гэж гуймаар байна.

-Солонгост та хоёртой хамт байгаа ахын тань виз дууссан гэсэн?

-Анх ахтайгаа хамт гурвуулаа виз мэдүүлсэн. Нэг өвчтөнд нэг асран хамгаалагч гэсэн хуулийн дагуу ахын виз гараагүй. Хоёр сарын хугацаанд бид хоёр эмчилгээтэй байсан тул эмнэлгээс гараагүй. Ингээд 70 хоногийн дараа дахин нэг асран хамгаалагч хэрэгтэй байна гэсэн бичгийг эмнэлгээсээ авч ахын виз 90 хоногийн хугацаатай гарсан. Визийн хугацаа дуусаж, дахин сунгах боломжгүй гэсэн. Ингээд энэ сарын 10-нд нутаг буцна. 

---