Испанийн зүүн хэсгийн Онда хотод болсон бухын уралдааны үеэр 55 настай эрэгтэй шархдан, улмаар нас баржээ.

Амиа алдсан эрэгтэй бухын дайралтад удаа дараа өртөж, мөргүүлсний улмаас толгойдоо гэмтэл авсан бөгөөд зүүн гуяны артерийн судас нь тасарсан байна. Түүнийг ойролцоох Виллареал хотын эмнэлэгт хүргэсэн хэдий ч тэрээр удалгүй нас барсан аж.

"Фира де Онда" наадмын хүрээнд зохион байгуулагдах бусад бухын уралдааныг цуцалсан болохыг Онда хотын зөвлөлөөс мэдэгджээ. Коронавирусийн цар тахлын хязгаарлалтыг өнгөрсөн зун сулруулсны дараа Испанид ижил төстэй уралдаанууд дахин өрнөх болсон билээ. Гэвч тус улсын иргэд бухаас зугтах тэмцээнүүдийг бүр мөсөн халах талаар мэтгэлцэж байгаа энэ үед бухын уралдаануудын тоо цөөрөх болсон юм.

Хотын нэг хэсэгт бухуудыг суллан, олон тооны оролцогч тэднээс зугтдаг энэхүү уралдаан нь эртнээс Испанийн уламжлалт соёлын нэг хэсэг байсаар ирсэн билээ.

Үүнтэй төстэй бухын уралдааныг хөрш зэргэлдээ Франц, Португалид ч зохион байгуулдаг бөгөөд тэмцээний үеэр бэртэл гэмтэл их гардаг юм.

Эх сурвалж: BBC

---