Ерөнхий сайд асан Ч.Сайханбилэг өчигдөр АНУ-аас Оюутолгойн хэлэлцээртэй холбоотой асуудлаар байр сууриа илэрхийлсэн. Энэ талаар болон хэлэлцээрийн явцын талаар ХЗДХ-ийн сайд Х.Нямбаатар Төрийн ордонд мэдээлэл хийлээ.

ХЗДХ-ийн сайд Х.Нямбаатар:

-Ч.Сайханбилэгийн яриаг сонссон. Харийн нутагт, харийн компанийг өмгөөлж ядмагхан, өөрийгөө өмөөрсөн зүйл ярьсан байна лээ. Найман жилийн өмнө байгуулсан гэрээгээ их зөв зүйтэй зүйл гэж ярьсан. Би эсрэг бодолтой байгаа.

Тухайлбал, бүтээн байгуулалтын зардал нэг тэрбум ам.доллараар хэтэрсэн байсныг хүлээн зөвшөөрч баталгаажуулсан. Татвартай холбоотой өнөөдөр үүсээд байгаа маргааныг хүлээн зөвшөөрсөн. Хамгийн аймшигтай нь, Оюутолгойн олборлолтын алт, зэсэн дээр АМНАТ авна гээд, бусад буюу молибден зэргээс АМНАТ авахгүй гэсэн гэрээнд гарын үсэг зурсан. Мөн, санхүүжилтийн баталгаа гэдэг шинэ зүйл гэрээнд тусгаж, гэрээ бүрээс 1,9 хувийн ашиг авна гэж оруулсан.

Бид энэ чигээрээ явбал 22 тэрбум ам.долларын өрөнд орохоор байгааг Оюутолгойн талынхан хүлээн зөвшөөрөөд, албан бичиг ирүүлээд байна шүү дээ. Санхүүгийн модель нь алдаатай.

Хэрэв үнэхээр Ч.Сайханбилэг өөрийн байгуулсан гэрээгээ зөв зүйтэй зүйл гэж үзэж байгаа юм бол эх орондоо ирж, хууль, хяналтын байгууллагаар шалгуулж үнэн мөнөө олох хэрэгтэй.

Бас нэг зүйлийг хэлмээр байна. Оюутолгойн хэлэлцээр эхлэх бүрд хийгддэг жагсаал, цуглааны ард Ерөнхийлөгч асан Ц.Элбэгдорж байдаг.

---