Японы Эрүүл мэндийн яамны зөвлөл тус улсын бүх оршин суугчийг коронавирусийн эсрэг вакцины нэмэлт тунд хамруулахыг зөвшөөрчээ. Гэхдээ иргэд хоёр дахь тунгаа тариулснаас хойш дор хаяж найман сарын дараа гурав дахь тундаа хамрагдах боломжтой аж.

Олон улсын эрдэмтдийн судалгаагаар вакцины үр нөлөө нь зургаан сар орчим үргэлжилдэг бөгөөд бүх насны хүмүүсийн эсрэг бие тодорхой хугацааны дараа багасдаг гэж тогтоогдсон тул тус улсын эрх баригчид ийм шийдвэр гаргасан гэжээ. Харин гурав дахь тундаа өмнөхөөсөө өөр вакцин тариулж болох эсэхийг Японы Эрүүл мэнд, хөдөлмөр, нийгмийн хамгааллын яамнаас ирэх 11 дүгээр сард албан ёсоор шийдвэрлэх гэнэ.

Бусад олон улс орнууд зөвхөн өндөр настай болон ноцтой шинж тэмдэг илрэх эрсдэл өндөртэй хүмүүсийн нэмэлт тунд хамруулж байгаа бол Японы албаныхан зорилтот бүлгийг өргөжүүлэхээр төлөвлөж байгаа аж.

Одоогийн байдлаар тус улсад "Пфайзер" болон "Модерна" вакциныг 12 ба түүнээс дээш насны хүмүүст үнэ төлбөргүй тарьж байгаа билээ. Түүнчлэн, "АстраЗенека" вакцинд зөвшөөрөл олгосон хэдий ч зөвхөн 40 ба түүнээс дээш насны хүмүүст зөвлөж байгаа юм.

Эх сурвалж: Japan Today

---